Уллайгъанлагъа жюрек жылыудан юлюш эте

   КъМР-ни Пенсиячыларыны союзу эмда Тиширыуланы Нальчик шахар совети  жашаулары келген  адамлагъа  "Сизге жюрек жылыуубуздан юлюш этебиз" деген ат бла  къууанчлы ингир къурагъандыла. Алайды да, Долинскдеги "Джамиля" кафеге республиканы  кёп жылланы  тюрлю-тюрлю бёлюмлеринде бет жарыкълы уруннган къауум адам  чакъырылгъанды. Аланы араларында урунууну ветеранлары, врачла, устазла, поэтле, алимле, эл мюлкде ишлегенле, кёп сабийли ата-анала, къурулушчула, юй бийчеле да болгъандыла.  Аладан иги кесеги бюгюнлюкде да бош турмайдыла, туугъан жерлерине хайыр келтиредиле.  Ала республиканы урунуу тарыхыдыла.
   Тиширыуланы шахар советини председатели Лидия Дигешева,  конакъланы алгъышлап бошагъандан сора, бу тюбешиу КъМР-ни Пенсиячыларыны союзуну  "Абадан тёлюге кёз-къулакъ болайыкъ!" деген проектине кёре бардырылгъанын эсгертгенди. Аны башламчысына, союзну  таматасы  Мурат  Тхазаплижевха, энчи ыспас этгенди.
   - Мурат Тулевич  кеси келалмагъанлыкъгъа,  сизни аны атындан  къызыу  алгъышларыбызны тилегенди, сизге саулукъ, узакъ ёмюр тежегенди,-дегенди тиширыуланы биригиулерини таматасы. 
   Уллайгъан адамланы дагъыда кёпле алгъышлагъандыла, ол санда жазыучу эм поэт, КъМР-ни культурасыны сыйлы къуллукъчусу Моттайланы  Светлана, эл мюлк илмуланы кандидаты Владимир Тлупов,  Пенсия фондну КъМР-де бёлюмюню башчысы Юрий Барсагов, урунууну ветераны  Татьяна Шулемова, Хасанияда тиширыуланы советини председатели Тёппеланы Рая.  Ала бу огъурлу ишни къурагъанлагъа да жюрек ыразылыкъларын билдиргендиле.
   Байрамны бютюн жарыкъ, бютюн жылы этгенлени  араларында  уа КъМР-ни культурасыны сыйлы къуллукъчусу Ирина Даурова, ол юйретген жаш жырчыла, "Тауланы сабийлери" юлгюлю сабий тепсеу ансамбль, Вольный  Аулда Лидия Азикова башчылыкъ этген 5-чи номерли сабий садха жюрюген къызчыкъла бла жашчыкъла  болгъандыла. Аппала бла ыннала  алагъа асыры ыразыдан, жерлеринде олтуруп туралмагъандыла, хар жыр айтылгъаны сайын ортагъа  чыгъып тепсегендиле.
   Ахырында республиканы Пенсиячыларыны союзу эмда  Тиширыуланы шахар совети  къурап бардыргъан тюрлю-тюрлю ишлеге тири  къатышханлагъа ол биригиулени  грамоталары, гюлле, Пенсия фондну белгилери бла акъ кёлекле да берилгендиле.
   Бу эки да жамауат организация бардыргъан  ишлеге уллу себеплик этгенлени атлары да айтылгъанды. Алайды да,  Вольный Аулда жашагъан Темиржанланы юйюрлерине,  Нальчикде Роза бла Алик Гетежевлагъа, Лидия Азиковагъа, Ирина Жабалиевагъа, Нина Чуповагъа, Ирина Дауровагъа бла аны студентлерине, дагъыда кёплеге уллу ыспас этилгенди.