Бизнесге къыралны жанындан болушлукъ этилликди

Россейге къажау санкцияла кийирилгенлери бла байламлы ата журтлу бизнесге къыралны жанындан себеплик этиуню мадарлары жарашдырылгъандыла. Правительство  IT-технологияла бла кюрешгенлеге льготала тохташдыргъанды, гитче бизнесни ишин тинтиулеге чекле кийиргенди, кредит каникулла да бериледиле. 

Гитче бизнес

10 мартдан жылны ахырына дери энчи предпринимательледе, орталыкъ эм гитче бизнесни субъектлеринде тинтиуле бардырыллыкъ тюйюлдюле. Жаланда адамны жашаууна эм саулугъуна къоркъуу салыннган предприятиялада жарарыкъды план тинтиулени тамамларгъа. Ол санда атом энергетикада, радиация къоркъуусузлукъну жалчытыуда эм башхалада.

 Амнистия

Предпринимательле мюлклерин эм банклада счётларын ачыкъ этиу жаны бла мадарланы чеклеринде, аны кеслерини ыразылыкълары бла бардырадыла, энди къолларында болгъан ахчаны да декларациягъа къошаргъа эркиндиле. Багъалы къагъытланы орунуна уа законда «финанс активле» деген ангылам кийириледи. Алай бла уа акцияла,  облигацияла бла   бирге   фьючер келишимле, башха финанс  документле бла  законлу халда хайырланыргъа онг боллукъду.   

 IT-технологияла                       

Россейде эсепде тургъан IT-компанияла файдаларына налогдан эм тинтиуледен 2024 жылны ахырына дери эркин этилликдиле. Алада ишлегенле уа льготалы ипотеканы алыргъа боллукъдула, дагъыда  ала аскерде къуллукъ этиуню арт болжалгъа да кёчюраллыкъдыла.

 Къырал жумушланы тамамлау

 Къырал эм муниципал жумушланы тамамлау жаны бла келишимлеге тюзетиуле кийирирге эркин этилгенди, эки жаны да ыразылыкъларын билдирселе. Сёз эки жаныны да терсликлери болмай, келишимде белгиленнген жумушланы толтурургъа онг болмагъан кезиулени юсюнден барады. Бу жорукъ 2023 жылда 1 январьгъа дери къабыл кёрюлген келишимлеге тохташдырылады.

Налогла   

2022 жылда 1 январьдан 31 декабрьге дери кезиуде налог контроль жаны бла жумушла тохтатылыргъа, неда болжаллары созулургъа боллукъдула. Ол жаны бла оноуну правительство чыгъарлыкъды.  Дагъыда налогланы, страховой тёлеулени  болжаллары да тюрленирикди.

2021 жылда ФОТ 3.0 льгота программагъа кёре берилген кредитлеге  6,2 миллиард сом субсидияла тохташдырылгъандыла.   Ахча  программаны биринчи эм экинчи бёлюмлерине кирген заемщиклеге берилликди. Биринчиден, къырал себеплик аш-суу жарашдырыу, къонакъбайлыкъ сфералагъа, культурагъа эм спортха юлешинирикди. Жаланда ала пандемияны кезиуюнде ишчилерини саныны 90 процентин сакълагъан эселе.

ФОТ 3.0 программагъа кёре, предпринимательлеге кередитле 3 процентге бериледиле. Бу мадар бизнесни тирилтир, ишсизликни азайтыр мурат бла тохташдырылгъанды.

Эл мюлк

Аграрийлеге алгъын берилген кредитлеге, ала уа 8 мингден асламдыла, субсидиялагъа 5 миллиард сом бёллюкдю правительство. Бу оноу регионлада жер сюрюу жумушла башланнган кезиуден  этилгени бютюнда магъаналыды.