Жангылыкъла

Кёп болмай Чегем районда  сюд приставла «Газпром межрегионгаз Нальчик» биригиуню келечилери бла бирге кёк отлукъ ючюн тёлемей, борчла этип тургъанланы юйлеринде болгъандыла.

Россельхознадзорну Къабарты-Малкъарда эмда Шимал Осетия-Аланияда Управлениясыны жерчиликге надзор этиу бёлюмю быйыл январьда бизни республикада онбеш контроль иш бардыргъанды. Ала бары да планда белгиленип эдиле, деп билдиргендиле бёлюмден.

Гуманитар тинтиулени институтунда Россей илмуну кюнюн белгилеуню чеклеринде илмуда жетишимлени «Вернисаж науки» деген кёрмючю ётгенди. РАН-ны КъМР-де Илму арасыны медиацентрини таматасы Фатима Магомедова билдиргеннге кёре, ары   кёп жаш адам келген эди. Ол санда «Альтаир» жаш тёлю клубну келечилери, Нальчикни 5 номерли эм Лячинкъая элни 2 номерли школларыны окъуучулары да.

Нальчикде 32-чи  номерли орта школну сабий садигини бир къатлы мекямыны къурулушу къыстау барады. Проект бла аны уллулугъу 711 квадрат метрден артыкъды. Кесини да  методика кабинети, физкультура  залы, быстыр жууучу, аш хазырлаучу мекямлары боллукъдула. Объект битсе, анда жыйырмашар сабий бла  эки къауум кечинирикди.

Нальчикден Москвагъа бла Санкт-Петербургга учхан «Аэрофлот» бла «Нордавиа» авиакомпанияла да билетле учуз болгъандыла.

Роспотребнадзорну КъМР-де Управлениясындан билдиргенлерича, бизни республикада грипп эмда ОРВИ бла ауругъанланы саны озгъан ыйыкъда эпидемия мардадан 61,5 процентге аз болгъанды. Нальчикде уа бу кёрюмдю 13,8 процентди.

"Саулукъ"  миллет проектге тийишлиликде Къабарты-Малкъарда  "Родовой сертификатла" деген программа жашауда бардырылады. Анга  акушерство эм гинекология  неда педиатрия  жаны бла ишлерге  лицензиялары болгъан эмда РФ-ни  Социал страхование фондуну   регион бёлюмю бла келишим этген  больницала  къошулургъа  эркиндиле.

    Къабарты-Малкъар Республиканы Нальчикдеги аскер комиссариаты 2019 жылда Россей Федерацияны Къоруулау министерствосуну, башха министерстволаны бла ведомстволаны бийик билим берген аскер окъуу юйлерине кирирге сюйгенлени араларында сайлаула башланнганларын билдиреди. Аны юсюнден толу хапар билир ючюн аскер комиссариатха келирге керекди. Аны адреси: Нальчик ш., Вологиров ор.,26 (45-чи номерли кабинет).

Кёп болмай Къабарты-Малкъар къырал университетде  «Leisurebusinesstravel» тюрк компанияны   таматасы Илимдар Риза  студентле бла тюбешгенди эмда туризм жаны бла бизнесни къурауну, ол жетишимли ишлерча не этерге керек болгъаныны юсюнден ушакъ бардыргъанды.

Жашау-журт коммунал мюлкде предприятияланы ишини, бу сферада берилген жумушланы юсюнден билдириу эмда ангылашынмагъан затланы кетерир умутда Нальчикде Главпочтамптны залында хар ай сайын «ачыкъ эшиклени» кюню бардырылады. Анга тёрели халда тюрлю-тюрлю ведомстволаны, ол санда КъМР-ни Энергетика, тарифле эмда жашау журтлагъа надзор этиу жаны бла министерствону келечилери да къатышыучудула.