Спорт

Нальчикни 31-чи номерли школунда КъМР-ни футболдан къыш чемпионатында хорлагъанланы къууанчлы халда саугъалагъандыла. Анга республиканы Футболдан федерациясыны президенти Аслан Машуков, «Олимпиада  комитет»  жамауат организацияны директору Александр Заруцкий, «Спартак-Нальчикни» алгъыннгы тренери Юрий Красножан, регионну спорт министрини орунбасары Заур Хежев къатышхандыла. 
Саугъалау белгили футболчу эм тренер, «Спартак-Нальчик» командабызны  юйретип тургъан Шамиль Исаевни бир минутну шош туруп эсгериуден башланнганды. 

Дондагъы Ростовда тхэквондодан «Донну кубогу» ючюн битеуроссей эришиу бардырылгъанды. Анга Россейден, Узбекистандан, Къазахстандан, Армениядан, Къыргъызстандан бла Азербайджандан 1200 спортчу къатышханды, ол санда Къабарты-Малкъардан да 42 адам.

Португалияны Коимбра шахарында 21 жыллары толмагъан спортчуланы араларында дзюдодан Европаны кубогу бардырылгъанды. Анга континентни 24 къыралындан 450 гёжеф къатышханды.  
Анда бизни респуликадан 66 килограмм ауурлукъ къауумда Мисирланы Исмайыл да тутушханды. Битеу тюбешиулерин болжалдан алгъа хорлам бла бошап, ол ахырында командасындан тенги Мулораджаб Халифаевни къытханды. Алай бла Исмайыл алтын майдал  бла къайтханды.
Суратда: солдан онгнга: Мисирланы Исмайыл экинчи.

Черкесск шахарда дзюдодан, КъЧР-ни Правительствосуну башчысыны орунбасары А.М. Тебу улуну хурметине эришиу къуралгъанды. Анга 2003-2005 жыллада туугъан спортчула къатышхандыла.
Анда 90 килограмм ауурлукъ къауумда бизни республикадан Гайыланы Омар жетишимли болгъанды. Ол, битеу тюбешиулерин хорлам бла бошап, алтын майдал къытханды. Ючюнчю жерге Тембулат Кумыков (66кг.) чыкъгъанды. Аланы тренерле Д.А. Иванов бла А.М. Апхудов юйретедиле.

Республиканы Чегем шахарында, СССР-ни спортуну устасы, КъМР-ни физкультурасыны эм спортуну сыйлы ишчиси А.Н. Аджиевни хурметине аталып, грек-рим тутушуудан эришиу къуралгъанды. Анга Къабарты-Малкъардан, Къарачай-Черкесден, Ингушетиядан, Къалмыкъдан, Ставрополь крайдан, Москвадан бла Санкт-Петербургдан 2007-2010 жыллада туугъан 270 гёжеф къатышхандыла.

«Петербург жаз башы» деген ат бла шимал ара шахарыбызны «Комета» спорт комплексинде каратеден тёрели битеукъырал эришиу бардырылгъанды. Анга Россейден бла жууукъдагъы тыш къыралладан мингден аслам жаш эм абадан спортчу къатышхандыла.

Нальчикде стилевой каратени фестивалы бардырылгъанды. Анда тренер Къараланы Асланны къолунда жарау этген спортчула алчы жерлеге чыгъып къууандыргъандыла.
Алай бла каратени кумитэ бёлюмюнде алтын майдалны Созайланы Азамат, Къулийланы Аслан, Къараланы Рамазан алгъандыла. Къараланы Мадина всестилевой каратеде, кумитэде да биринчи болгъанды. Ала энди Саврополь крайны всестилевой каратеден биринчилигинде сермеширикдиле, ол а 13-14 апрельде боллукъду. Ставрополь крайны чемпионатына Жанкишиланы Герман да къатышырыкъды, ол республикалы эришиуде кюмюш майдалны къытханды. 
 

Владимир шахарны «Полярис» буз мекямында Россейни грек-рим тутушуудан биринчилиги къуралгъанды. Анга къыралны 63 регионундан 18 жыллары толмагъан 500-ден аслам спортчу къатышхандыла. 

Алгъаракълада «Track and Field» («Женгил атлетика») деген атлы  даражалы америкалы журнал къыш кезиуню эсеплерине кёре бек иги спортчуланы тизмесин туура этгенди. Женгил атлетикада айырмалыгъа бийикге секириуден дунияны тёрт къатлы чемпионкасы Мария Ласицкене бек игиге экинчи кере саналгъанды. 
Журналда жазылгъаныча, озгъан къыш кезиуде дунияны спортчулары 2.00  метр бийикликни 14 кере алгъандыла. Ма аладан тогъузусуна бизни жерлешибиз жетишгенди. Ол дагъыда озгъан сезонда  2.04 метрге секирип, барысын да озгъанды

Тырныауузну В.А. Губанов атлы «Геолог» спорт-саулукъ кючлеу комплексинде каратеден Къабарты-Малкъарны биринчилиги бла Тиширыуланы халкъла аралы кюнюне аталгъан эришиу бардырылгъандыла.