Ууну хатасы жетгенди

Былтыр августда Черек районну Зарагиж элинде халкъны газ бла жалчытыу службаны къуллукъчулары жашау журтладан биринде газ оборудованияны тинтген кезиуде бузукълукъла этилгенлерин ачыкълагъандыла:   печь эм сууну жылытыу колонка ванныйде салынып эдиле. Алай анда хауаны тартыу ыз къуралмагъанды. Бу кемчиликле бла байламлы тийишли акт жарашдырылып, газ оборудованияны хайырланыугъа чек салыннганды. Аны бла бирге, юйню иесине кемчиликлени кетергинчи, аланы жандырыргъа жарамагъаны, ол къоркъуулу болгъаны ангылатылгъанды.

Болсада эр киши бу излемлени сакъламагъанды. Ол котелну, печьни да жандырып, ала бла хайырланып башлагъанды. Аны хатасындан отоуда газ уу жыйылып,  быйыл 10 январьда эр кишини жууугъу ууланып ауушханды. Следовательле бушуулу болумну сылтауларын тинтедиле, ишни болумун тохташдырадыла.

Бу шартла бла байламлы РФ-ни СК-сыны Черек районда бёлюмюню следовательлери РФ-ни УК-сыны 109-чу статьясыны 1-чи кесегине кёре терслеу материалла жарашдыргъандыла – сунмай, адамны ёлтюргени ючюн.