Ахчаны сакъларгъа онг барды

Былтыр Сюд приставланы федерал службасыны КъМР-де Управлениясына инсанладан жашау этерге жетерик ахчаны эм аз ёлчемин сакълауну юсюнден юч мингнге жууукъ тилек келгенди.

Аладан  2782 -си къабыл кёрюлюп, республиканы инсанлары бу эркинликлери бла хайырланнгандыла.   Борчну тёлетиу жаны бла бегимни толтургъан кезиуде жашау этерге жетерик ахчаны эм аз ёлчемине тиерге жарамагъаныны юсюнден закон кючюне кирген кезиуден бери уа   Управлениягъа юч  мингден аслам тилек келгенди. 

 Эсигизге салайыкъ, инсанлагъа сюдню оноуу бла борчларын тёлетиу жаны бла мадарла толтурулгъан кезиуде, аланы банкда счётларындан жашау этерге жетерик ахчаны эм аз ёлчемине тиерге эркин этилмейди. Ол жаны бла закон былтыр февральда кючюне киргенди.  Бу эркинлик бла хайырланыр ючюн а, сюд приставлагъа ол жаны бла тилек жазаргъа эмда инсанны файдаларыны юсюнден документни кёргюзтюрге керекди.

Заявленияны Госуслуги порталда берирге да боллукъду. Аны  

https://www.gosuslugi.ru/600367/1/form бетде толтурургъа жарайды. Дагъыда порталда къуралгъан болушлукъчуну онглары бла хайырланыргъа да боллукъду.  Максим робот къаллай документлени толтурургъа кереклисин кёргюзтюрюкдю. Алада уа ахча сакъланыллыкъ  счётну    тарихлери, банкны аты бла орналгъан  жерин  билдиредиле. Инсанны социал болумун да кёргюзтюрге тийишлиди: ишчи жыл санда болгъанын, неда пенсиягъа чыкъгъанын.

 Болсада алиментле, адамны саулугъуна салгъан заран эмда  аманлыкъны хатасы ючюн борчну тёлегенде, бу мадар бла хайырланыргъа жарамагъанын эсгертедиле сюд приставла.