Жолгъа эсирип чыкъгъанла азаймайдыла

«Кеф водитель» кезиулю энчи жумушланы кезиуюнде эсирип, неда машинаны жюрютюрге эркинликлери болмагъан 39 водительни ачыкълагъандыла жолда жюрюуню инспекторлары. Энчи стоянкагъа 33 улоу жетдирилгенди.

Рейд бардырылгъан къысха заманны ичинде 10 инсан машиналарын эсирип  жюрютгенлери тохташдырылгъанды. Ала медицина тинтиуледен ётерге унамагъандыла. Аладан бирини уа транспортну жюрютюуге эркинликлерине чекле салыннганлары да белгили болгъанды.

КъМР-де УГИБДД-ны къуллукъчулары ангылатханларыча, РФ-ни КоАП-ыны 12.8-чи статьясыны 1-чи кесегине тийишлиликде, эсирип машинаны жюрютген, неда медицина тинтиуледен ётерге унамагъан инсанны правалары эки жылгъа сыйырылыргъа боллукъдула. Дагъыда анга 30 минг сом тазир салынады. Бу бузукълукъну къайтарып этген а 200-300 минг сомун тас этерге хазырлансын, дагъыда аны машинаны жюрютюрге эркинлиги 2 жылгъа сыйырылады, неда ол  борчлу халда 480 сагъатны хакъсыз ишлеге тартылады.  

РФ-ни КоАП-ыны 12.7-чи статьясыны 4-чю кесегине кёре уа, машинаны жюрютюрге эркинлиги сыйырылгъан инсан жолда  тутулса (ол уголовный аманлыкъ этмеген эсе),  анга 50-100 минг сом тазыр салынады.  Неда ол борчлу халгъа 150-200 сагъатны хакъсыз ишлерикди.  

 Право низамны сакълаучула  машинаны водители кеф болгъанын билген кезиуде, неда биреу жолда кесин  былхымсыз жюрютгенин, башхалагъа къоркъуу салгъанын кёргенде, аллай шартланы бу телефон номерлеге сёлешип, белгили этеригизни тилейдиле: 8(8662) 49-50-62, 96-10-00, 91-10-96 неда 102.

Жамауат, право низамны сакълаучула да бирге болсала, жолда жюрюуню къоркъуусузлугъун жаланда ол кезиуде сакъларгъа боллугъун эсгертедиле къыралавтоинспекторла.