Республика байрамгъа хазырланады

Къабарты-Малкъар къуралгъанлы быйыл 100 жыл боллукъду. Аны бла байламлы республикада уллу тюрлениуле эм тапландырыу ишле бардырыладыла.

 Нальчикни орамларына тынгылы ремонт этиледи, жер-жерли администрацияны муратларына кёре, юч проспектге тынгылы ремонт этгенден сора да,  сентябрьге шахарда жети жангы жамауат жер къураллыкъды.

Абхазия майданны бла Сабий эм жаш тёлюню чыгъармачылыкъ юйню  ортасында республиканы 100-жыллыгъына сквер боллукъду. Башхача айтханда, шахарда ёсген тереклени ортасында адамла солурча жер къураллыкъды. Аны ишлегенде, бир терек да кесиллик тюйюлдю. Бу проектни этгенде, ол соруугъа уллу эс бурулгъанды.

 Скверни ортасында орналгъан павильон Къабарты-Малкъарны тарыхыны эм маданият хазнасыны юсюнден хапарларыкъды.

 Мияладан ишленнген павильон кёрмючле бардырыучу залгъа ушайды, анда Къабарты-Малкъарны белгилеген скульптура къауум сюелликди. Аны тёгерегинде кёрмючле бардырыллыкъдыла, лекцияла окъурукъдула.  Ингирликде мекямны тёгереги чыракъла бла жанарыкъды эм шахарда жашагъанлагъа бла ары къонакъгъа келгенлеге ариу белги боллукъду.

 Жай кезиуде анда таза хауада кинола кёргюзтюрге, тюбешиуле къураргъа онг боллукъду. Ол жумушланы тамамларгъа алайда экран эм адамла олтурурча шинтикле да боллукъдула. Сквер орналгъан жерге адамлагъа таплыкъгъа бетондан жолчукъла ишленирикдиле, ол кезиуде тереклеге заран тюшерик тюйюлдю.  Дагъыда былайда сабийле бла аланы   аналары ойнарча аламат боллукъду. Ол тийреде сабийле ойнагъан майдан эм башха затла да ишленирикдиле.

Бизни корр.