Республиканы инвестиция онларын сюзгендиле

Къабарты-Малкъар Республикада инвестиция онгланы айнытыу бла байламлы ишле тамамланыладыла эм аланы жашауда бардырыргъа тап онгла къураладыла. Регионну Башчысы Казбек Коков россейли предпринимательлени Кюнлерини аллында КъМР-ни экономиканы айнытыу министри Рахайланы Борис бла тюбешгенди, озгъан жылда болдургъан ишлени сюзгендиле, шёндюгю болумгъа къарагъандыла эм келир заманнга къаллай борчлары болгъанларин белгилегендиле.                                                        Бюлюмледе толтурулгъан ишлени юслеринден министрни орунбасарлары Темиркан Баждугов  бла Ольга Белецкая эм КъМР-ни Айнытыу корпорациясыны оноучусу Чочайланы Ахмат билдириуле этгендиле. Аны юсюнден республиканы оноучусуну пресс-службасындан билдиргендиле.

Тюбешиуде къырал эм энчи иели мюлкле бла байламлыкъны жюрютюню, гитче эм орталыкъ предпринимательликни  эм инвестиция проектлени  жашауда бардырыуну юсюнден соруула сюзюлгендиле. 

Пандемияны хатасындан шёндю болгъан къыйын кезиуге кёре,  озгъан жылны кёрюмдюлери  бла республикада инвестицияланы ёсюмлери барды, 2020 жыл бла тенглешдиргенде. Къурулушда, эл мюлкде, жарашдырыучу производствода, туризмде  бир кесек ёсюм кёрюнеди. Тамамланнган проектлени арасында кёгетлени сакълагъан шёндюгюлю комплекслени,                     агропромышленность бёлюмню биригиулерин  жангыртыу, эл мюлк продукцияны жангы тюрлюлерин чыгъарыу, къурулуш бёлюмде жангы юйлени хайырланыугъа бериу эм инфраструктуралы проектлени тийишлисича бардырыуну белгилерге боллукъду. Къонакъ алыу бизнесде эм аны бла байламлы жумушланы тамамлауда инвестицияла хайырланыладыла, ол а республикагъа жолоучуланы кёп келгенлерини белгисиди.

Сагъынылгъан проектлени жашауда бардырыу министерствону баш борчларындан бириди, ол санда методика, административ  эм инфраструктура жаны бла республиканы экономикасын айнытыргъа бек керекли инвестиция проектлеге болушлукъ этиледи.

 Озгъан жылда КъМР-ни Айнытыу корпорациясы тюрлю-тюрлю къырал программаланы хайырланыуда 40 инвестиция проектни жашауда бардырыргъа болушханды. Шёндю къонакъ алыу бёлюмде проект-смета къагъытланы эм бизнес-планланы жарашдырыуда къагъытла хазырланыладыла. Эл мюлкде, къурулушда жангы производстволаны ачыу  эм жангыртыу ишле бардырыладыла.  Бюгюнлюкде республикада  экономиканы тюрлю-тюрлю бёлюмлеринде битеу алып айтханда жюз миллиард сом багъасы 25 инвестиция проектни хайырланыргъа мурат барды.  Инвестицияланы республикагъа келтириу бла байламлы иш андан ары бардырылады.    

«Битеу белгиленнген инвестиция проектле алгъадан белгиленген планлагъа кёре бардырыладыла эм кереклисича къырал болушлукъну аллыкъдыла», - дегенди республиканы оноучусу. Казбек Коков шёндю экономикада   бола тургъан ишле бла байламлы башда сагъынылгъан корпорацияны ишин тирилтирге эм  республикагъа магъаналы бёлюмлерине инвестицияланы келиулерин тирилтирге  буюргъанды.