«Анамы огъурлу ызы бла барыргъа сюйгенме»

Ахкобекланы Фатимат Масхутовна 1990 жылда Къабарты-Малкъар къырал университетни математикадан факультетин бошагъанды эм андан бери устаз болуп ишлейди.  Алты жылны туугъан элинде Огъары Чегемде уруннганды, андан сора уа – Хушто-Сыртда.

Бу усталыкъны уа анасындан кёрюп сайлагъанды. «Анам, Агаланы Баближан Махараевна, устаз эди, мени да окъутханды. Ол а бютюн уллу жууаплылыкъ салады, ол дефтерлерибизге къараса, бир жерде уа халат иймеге эдим деп тургъанма. Анам бла ёхтемленеме, неде да тазалыкъны излеген, ишини, окъуучуларыны, жамауатны аллында жууаплылыгъын терен сезген, ариу тилли инсан эди ол (жаннетли болсун). Мен да анга ушаргъа, аны ызы бла барыргъа сюйгенме», - дейди Фатимат Масхутовна.

Математика тынч предмет тюйюлдю, аны ангыларча сабийни фахмусу болургъа тийишлиди. Ахкобекланы Фатимат айтханыча, бу дерсни энчиликлерине къыйынсыз тюшюннген окъуучула аздыла. Сабий жорукъланы ангылап, кёзчюклери жылтырагъанын кёрсенг – ишинги магъаналылыгъына тюшюнесе, кёлюнг кётюрюледи. Ангылаялмагъанга уа тынч, керек болса, бир ненча кере да къайтарып айтыргъа тийишлиди, алагъа кёбюрек эс бёлюрге, кёбюрек ишлерге керекди. Сабий теманы къыйынлыгъын эслемей ангыларча, энчи, тынч сёзле излейме. Дерследен сора консультацияла бардырама, бир ненча ставкам болгъанча, ингирде бешге дери школда окъуучула блама. Элибизде Жансуйланы Фатима Аслановна жаш специалистди, мен сизни сюйюп, аны ючюн болгъанма математик деген эди – окъутхан сабийинг алай айтса, бек хычыуун кёрюнеди. Ол кезиуде къыйынынг бошуна кетмегенин, миллетинге игилик келтиргенинги кёресе.

Акъылыбыз, эсибиз да сабийлени окъутууда, аланы абадан жашаугъа хазырлаудады. Окъуучу теманы кёлден билип къоймай, тинтилген теманы юсюнден сагъыш этерге, ойларгъа керекди, ол заманда дерсде билгени эсинде кёпге къаллыкъды, артда жашауунда да жарарыкъды. «2» белгини салыргъа сюймейме, салгъан да этмейме. Окъургъа кюрешип, алай болалмагъан сабийни аман белги бла кёлюн тюшюртюрге жарамайды. Аны къармашханын, кюрешгенин кёре эсенг, огъурлулукъ этерге керекди, дейди устаз. Фатимат Масхутовнаны да бийик квалификация категориясы барды, ишине жюреги бла берилгени ючюн а 2011 жылда Билим бериу министерствону Сыйлы грамотасы бла саугъаланнганды.