Устазны ишини ёзеги – сабийлеге сюймеклик

Тохаланы Жаннет Исхаковна орус тилден бла адабиятдан окъутады. Ол устаз болуп ишлегенли тамам 45 жыл толгъанды, Хушто-Сыртны школунда уа 40 жылны урунады. Усталыкъ билимни ол Къабарты-Малкъарны къырал университетинде алгъанды, Тарых-Филология институтну  тауусханды. Жетишимли ишлегени, сабийлени окъутуугъа салгъан уллу къыйыны ючюн 1991 жылда «Халкъ жарыкъландырыуну отличниги» деген белги бла саугъаланнганды, бийик квалификациясы барды. Билимин, заманын, къарыуун да аямагъанлай кюрешгенине уа школчуланы экзаменлени къалай бергенлери шагъатлыкъ этедиле – былтыр анда окъуп кетгенле ЕГЭ-де 80-90 балл алгъандыла. Бир къырал экзаменни эсеплерине кёре, ала районда экинчи жерде барадыла, олимпиадалада саугъаланнганланы къауумуна дайым къошуладыла.

Сабийлени  юйретиуню - къыйын, аны бла бирге уа огъурлу ишни – ол кесини устазындан юлгю алып сайлагъанды.

Тёбен Чегемде бизни оруслу устазла окъута эдиле – Мирошник Валентина Тихоновна бла аны эри Петренко Анатолий Васильевич. Ала дефтерлени да алып дерсге келгенлерин кёргенде къууаннганма, сукъланнганма. Халатларыбызгъа къарамагъанлай, ишлерибизни тинтмегенлей, ала бир заманда да дефтерлерибизни къайтармагъандыла. Устазларымча, кесим да, юйге келгенлей, сабийлени жазгъанларына къарайма.  Завучубуз Хочуланы Лейля Магомедовнаны (жаннетли болсун) да эсгермей болмайма. Мен ишлеп башлагъанлай ол кесини классына мени башчы этип салады. Андан кёп затха юйреннгенме, дерсге план жарашдыргъанда, бир минутну, такъыйкъаны тас этмезча, хар затны белгилегенме. Бир кере райондан методист Мартыновну башчылыгъында комиссия келеди, аны санында уа 17 адам бар эди. Ачыкъ дерс берирге керек эдим. Комиссиядан аз да буюкъмагъанма, жангыз да Лейля Магомедовнадан уялгъанма. Дерсден сора, бизге бир он «!» белги салгъан болур эдиле, кесибизге да «гвардейский класс» деп атап. Университетден да бек Хочуланы Лейля юйретгенди, къыйыны бек уллуду, деп эсгереди Жаннет Исхаковна.

Устазны ишинде бу затны уа магъанасы азыракъды дерча бир шарт да жокъду. Алай, Тохаланы Жаннет сабийлени сюймесенг, алагъа билим да бералмазлыгъынгы чертеди. Каникулланы кезиуюнде сабийлеге тансыкъ болама. Сохталарым эсимдедиле, кёплери бла ёхтемленнген да этеме, сёз ючюн, Энейланы Асият, Жансуйланы Жамиля, Гижгиланы Айгуль, Тохаланы Разият бла Милана эм башхалары. Юйюнде ариу юйреннген бала, мектепде да адежлиди, дейди ол.

Бюгюнлюкде школда билим бериу системагъа кёп тюрлениуле кийириледиле. Жаннет Исхаковна совет сынамны ахшылыгъын чертеди - эм игиси дерсде сабий бла бир тил табыуду, арада ушакъ бардыра билгеннге бир зат жетмейди. Бусагъатда Интернетде информация кёпдю дейдиле, алай адамны кесини акъылы, билими болмаса, телефондан кёп хайыр чыкъмаз. Сетьде халатла да кёп тюбейдиле, сабийлени аланы кёрюрге, болгъан жорукъланы хайырлана, тюзюн, кеслерини оюмларын къоруулай билирге юйретирге тийишлиди, дейди ол.