Айырмалыла хунерлерин финалда сынарыкъдыла

КъМР-ни Жарыкъландырыу, илму эмда жаш тёлюню ишлери жаны бла министерствосундан билдиргенлерича, быйыл республикада  160-дан  аслам жаш адам «WorldSkills Russia -2022» чемпионатны республикалы кесегине къатышырыкъдыла. Эришиуле жыл санларына кёре юч категорияда 26 усталыкъда ётерикдиле. Быйыл прогрммагъа энтта да юч жангы компетенция къошулгъанды – «Гитче классланы устазы», «Школгъа дери билим бериу учрежденияны юйретиучюсю» эм «Агъач мюлк бла байламлы  инженерия».   

Чемпионат республиканы сегиз билим бериу учреждениясында  онеки тюрлю майданда ётерикди. Жаш усталаны ишлерине 210 чакълы эксперт къарарыкъды. Алагъа 125 волонтёр болушурукъдула.

Ишчи программа тюзюнлей халда бардырыллыкъды. Аны бла бирге министерствола бла ведомстволаны, предприятияланы, фирмаланы, компанияланы келечилери къатышып, «тёгерек столла», мастер-классла, кёрмючле да ётерикдиле.   

КъМКъУ-ну пресс-службасындан билдиргенлерине кёре, стоматологиялы ортопедия, башланнган классланы устазы, школгъа дери юйретиу эм Веб-технологияла компетенцияладан практика жаны бла юйретиуле да боллукъдула.

«Жаш профессионалла» чемпионатны регион кесегинде хорлагъанла быйыл Саранск шахарда онунчу кере бардырыллыкъ финалгъа барлыкъдыла.