Аграрчылагъа болушлукъгъа

Быйылны  ахырына  агропромышленный  комплекс бла байламлы объектлени къурулушларына   неда жангыртыугъа  этилген къоранчланы бир кесегин къайтарырча    Къабарты-Малкъаргъа  федерал бюджетден  463,3 миллион сом бёлюнюрюкдю.

Сёз  Россей Федерацияны Эл мюлк министерствосу къабыл кёрюп   2017-2020 жыллада Къабарты-Малкъарда жетишимли  бардырылгъан жыйырма инвестициялы  проектни юсюнденди.  Анга кёре республикада жемиш бла тахта кёгетден 45 минг тоннаны   сакъларча  19 комплекс эм нартюхден  5 минг тонна  айырмалы урлукъ жарашдыргъан ара  ишленнгенди.  

Къырал болушлукъгъа  субсидия берилгинчи юч жыл алгъа ишленнген неда жангыртылгъан  объектле эм заяленияланы  болжалындан кеч къалмай жибергенле тийишли болгъандыла. Аны хайыры бла  аграрчыла къоранчларыны 20,1 процент чакълысын  къайтараллыкъдыла.

Федерал  ахчадан сора да, сагъынылгъан проектлеге республикалы бюджетден да 2,3 миллион сом жиберилгенди.