Бизнесни башларгъа эм бардырыргъа юйретиу

 Кёп болмай «Хар кимге жангы амалла»  федерал эм «Билим бериу» миллет проектлени чеклеринде Къабарты-Малкъар къырал университетде  къошакъ халда усталыкъ алырча  эмда квалификацияларын ёсдюрюрча   курсла  бардырылып  башлагъанларын  билдиредиле  вузну пресс-службасындан.

Окъуу программада  «Цифралы ёмюрде билим бериу: къыйматлы амалла, инструментле, технологияла», «Гитче бизнесни башлау эм бардырыу», «Жукъгъан аурууланы болдурмазча этиу» дегенча темалагъа жораланнганды.    Ол проект  РФ-ни Илму эм бийик билим бериу министерствосуну грантыны ахчасына  бардырылады. Саулай алып айтханда,  курслагъа 18-65 жылгъа дери   къыралда, ол санда Къабарыты-Малкъарда да юч мингнге жууукъ адам къатышады. 

КъМКъУ-ну бухгалтер учет, анализ эм аудит жаны бла кафедрасыны таматасы  Рената  Шибзухова айтханнга кёре, «Бизнесни къураргъа эмда бардырыргъа юйретиу» программа кесин бу бёлюмде кёрген къайсы инсаннга да бек кереклиди.   Жер жюзюн кризис эм  пандемия бийлеген  кезиуде  кёпле ишлерин тас этедиле. Бирле-бирле къыралдан болушлукъ скъласала да,  башхала уа  предпринимательстволукъ  бла кюреширге итинедиле. Бу жаны бла  бютюн урунуу жолларын энди башлай тургъан жаш адамла къармашсала игиди.    

 Тюрлю-тюрлю бёлюмледен къуралгъан окъуу программа   72 сагъат  барады. Сёз ючюн,  бизнес бла байламлы:   налогла тёлеуге, адамла бла ишлеуге,  келишимле къурауну эм гитче бизнесге болушлукъ тапдырыугъа   тынгылы  къаралады.  

 Предпринимательстволукъ иш бла кюреширге, бир тюрлю продукт чыгъарыргъа, андан файда тюшюрюрге   кёпле излейдиле. Болсада ахшы проекти  болгъан ол азды,  аны бардырыр  ючюн   билим эм таукеллик да  керекди. Ол себепден  курсла сынамлары болгъан бизнесменлеге эм ишлерин энди башларгъа сюйгенлеге да  болушурчадыла.

Курслагъа жюрюгенлеге эм аттестацияны да  ётгенлеге  квалификацияларын ёсдюргенлерине шагъатлыкъ къагъытла берилликдиле.