Солугъанлагъа тынчлыкъгъа – «жол карта»

Къабарты-Малкъарны Курортла эм туризм министерствосундан билдиргенлерине кёре,  правительство туризмни айнытыу бла байламлы «жол картагъа» тюрлениуле кийирирге оноу этгенди. Анда 15 пункт барды, аланы хар бирине кёре норматив актла жарашдырыладыла.

Алай бла апрельде къонакъ юйледе болжаллы халда тургъан туристлени эсепге салыуну тынчыракъ этерге белгиленеди. Къонакъладан, ала «Госуслуги» мобильный приложенияда документлерин электрон халда кёргюзталлыкъ эселе, паспортлары сураллыкъ тюйюлдю. Сора, Россейни гражданлары къонакъ юйледе тыш къыраллагъа барыргъа эркинлик берген паспортлары бла да кирип жашаяллыкъдыла.

Андан сора да, апрельде «тау лыжа комплекс» деген ангыламны кийирген законопроект хазыр этилликди, анга кёре тау лыжа комплекслени инфраструктураларыны объектлерини тизмеси бегитилликди. Аланы санында тау лыжа жолла, жалгъан къар чыгъаргъан системала, канат жолла, къонакъ юйле, ашханала, инвентарьны хаух берген жерле эм тау лыжа курортланы ишлеулеринде керекли башха объектле боллукъдула.

«Жол картаны» хайыры бла бизнесге салыннган аслам чекле кетерилликдиле, власть органланы, предпринимательлени эм туризмде ишлеген специалистлени араларында тюзюнлей байламлыкъла тохташдырыллыкъдыла.