Танг кесек абонентге чек салыннганды

Быйыл «Россети Северный Кавказ» - «Каббалкэнерго» биригиу  аслам заманны тёлемей тургъан 253 абонентге токну хайырланмазча  чек салгъанды.  Ол кезиуде  аланы 1,1 миллион сом берликлери бар эди.

Саулай алып айтханда, жыл башланнганлы ток ючюн кёп заманны  тёлемеген 8,3 минг абонентге борчларын жабаргъа кереклисин айтып, заявкала берилгендиле. Андан 6,7 минги энчи иелиле эм 1,7 минги  организацияладыла.  Ала 169,1 миллион сом чакълы борч этгендиле.  Алай бла, эсгертиуле этилгенден сора, 8,1 минг абонент борчларын жабаргъа ашыгъып, 168 миллион сом тёлегендиле.

Эсге сала айтсакъ, эки айдан аслам тёлемеген юйге ток бармай къалыргъа боллукъду.  Аллай адам ток бла жалчытылыныр ючюн борчун толсунлай жабаргъа тюшерикди. Ол санда ток чыбыкъны кесгенлерине эм къошханларына да кеси тёлерикди. Аны ёлчеми объектни къыйынлыгъына кёре болады. Сёз ючюн, жашау журтну иеси 3 минг, биригиуню таматасы уа 10 минг сом берликди. Жууапха тартылгъанла уа РФ-ни Уголовный кодексини 165 -чи статьясына тийишлиликде эки жылгъа тутулургъа боллукъдула. 

Токдан чеклендирирге къоркъуу чыкъгъанын хайырланыучула электрон почталарында, компанияны сайтында «Коммунал жумушладан чеклендириу реестр» бёлюмню «Клиентлеге» деген кесегинде неда СМС бла жиберилген билдириулеринде окъургъа боллукъдула. Тёлеулени биригиуню офислеринде тамамларгъа онг барды. Юйлеринден чыгъалмагъанла неда заманларын къоратыргъа сюймегенле, ол санда башха жерледе тургъанла, «Энчи кабинет», «Свет Онлайн» эм «СберОнлайн» мобиль приложенияланы хайырланыргъа боллукъдуа. Бир тюрлю сылтау бла толусунлай борчун жабалмагъан реструктуризация этилирча келишим къураргъа онгу барды. 

Эсеплеген приборда токну къаллай бир ойнагъанын биригиуге 23-25 числодан кеч къалмай билдирирге тийишлиди. Тёлеулени уа айны онусундан  кеч къалмай тамамласа игиди. 

Андан  сора да, «Россети Северный Кавказ» – «Каббалкэнерго» биригиу сагъынылгъан  кезиуде  сетьледе токну тас болгъанын (урланнганын) 0,64 процентге  азайтыргъа онг тапханды. 

Аны баш сылтауларындан бири энергетикле  кюн сайын аманлыкъчыла бла къажау тургъанларыды. Сёз ючюн, былтыр специалистле токну эркинликсиз хайырланнганларына  225 шартны ачыкълагъандыла. Аны кезиуюнде 17,8 кВт. сагъат урланнганды эм биригиуге 125,5 миллион сом багъасына къоранч салыннганды. 

Бюгюнлюкде «акъыллы» счётчиклени себеплиги бла къоранчланы азайтыргъа онг табылгъанды. Ала показанияланы тюз кёргюзтгенлеринден тышында, адам къолу заран салса, бузукълугъу болса эм  ток урланса  билдиредиле. Былтыр аллай устройстволадан республикада 42 минг чакълысы жарашдырылгъанды.

Эркинликсиз, ол санда эсеплеген приборсуз токну хайырланнганла (урлагъанла) да  административ эм уголовный жууапха тартыладыла. Анга кёре, энчи иелиле 15-30 эм биригиуле уа 100-200 минг сом тазир тёлерге тюшерикдиле.

Хайырланылгъан ток ючюн заманында этилген тёлеулени хайыры бла республиканы электрокюч бёлюмю ишин тынгылы бардырады, ол санда ток бла сылтаусуз жалчытырча эм аны качествосун ёсдюрюрча мадар этиледи.