Эсепле белгиленнгендиле

Бу кюнледе Къабарты-Малкъар къырал университетде школчуланы регион даражада къуралып бардырылыучу предмет олимпиадаларыны – программированияны бла орус тилни – эсеплери белгили болгъандыла. Алагъа сегизинчи-онунчу классланы окъуучулары къатышхандыла.

Бу жол информатика дерсни сюйген жетмиш чакълы жаш бла къыз сынагъандыла кеслерини билимлерин программированиядан сынаулада. Олимпиада КъМКъУ-ну информация технологияла эмда экономика колледжинде озгъанды.

Эки сагъат бла жарымны ичинде сабийлеге жыйырма тест соруугъа жууапла берирге, андан сора да, беш практика магъаналы задачаны тамамларгъа керек болгъанды. Олимпиадада жетишимлилеге Нальчикни экинчи номерли лицейи бла жыйырма тогъузунчу номерли гимназиясы саналгъандыла.

Алай бла информатикадан дипломантланы санында жыйырма тогъузунчу гимназияны окъуучулары Энейланы Магомет (10 кл.) бла Мокъаланы Бийаслан (9 кл.) да бардыла. Ючюнчю жерге уа экинчи лицейден Азамат Сижажев (10 кл.) чыкъгъанды.

Орус тилден олимпиадаланы алып айтханда да, шахарны мектеплерини арасында айырмалыла сагъынылгъан лицей бла бир-бир дерследен терен халда билим берген тогъузунчу номерли школдула. Биринчи оруннга лицейни онунчу классыны окъуучусу Диана Кодзокова тийишли болгъанды.

Эсгерте кетейик, университетде быллай сынаула жашлагъа бла къызлагъа мектеплени бошагъанларындан сора кесибизни бийик окъуу юйлерибизни студентлери болургъа сейирлерин къозгъау бла байламлыды. Андан сора да, олимпиадада окъуучу къайсы дерсден ахшы кёрюмдю болдургъанына тийишлиликде, ол предметден анга Бир къырал экзаменини эсебине юч неда беш балл къошулады.

Бу олимпиадагъа сагъынылгъан колледжни окъуучулары да къатышхандыла. Сёз ючюн, программированиядан экинчи жерни Жабелланы Исхакъ алгъанды. Ючюнчю оруннга уа Иттийланы Алим тийишли болгъанды.         .