Байламлыкъланы кенгертир муратда

Кёп болмай Къабарты-Малкъар къырал университетни келечилери Москваны билим бериу бла байламлы халкъла аралы салону - «ММСО.EXPO-2023» деген къырал даражалы кёрмючюне къатышхандыла. Делегацияны къауумуна вузгъа киргинчи хазырлау эм усталыкъ сайларгъа болушуу   управленияны таматасы Аксана Карашева, педагогика, информация технологияла эм экономика колледжлени экинчи эм ючюнчю курсларыны окъуучулары Рузана Мамбетова бла Ногъайлыланы Камила болгъандыла. Бу жол ол Педагогну бла насийхатчыны жылына аталып ётгенди.

 «ММСО.EXPO-2023» кёрмючде билим бериу учрежденияланы келечилери, педагогла, окъуучула эм ата-анала да бёлюмню жетишимлери бла шагъырейленирге онг тапхандыла. Аны магъанасы профессионал биригиуню эм башхаланы да жангы продуктла бла шагъырей этергеди.

Аксана Карашева айтханнга кёре, быллай даражалы кёрмючде кеслерин танытыргъа, коллегаларыны жетишимлерине къараргъа эм жангы байламлыкъла къураргъа онг табылады. Ол санда тыш къыралланы   келечилери бла. Кёрмючде КъМКъУ-ну стенди ишлегенди. «Бизни амбассадорла салоннга келгенлеге (абитуриентлеге) университетни юсюнден тынгылы хапар айтхандыла эм мында окъугъанны энчилигин да билдиргендиле», - дейди Аксана Георгиевна.   

Кёрмючню чеклеринде тюбешиуле да ётгендиле. Ала бюгюнлюкде билим бериуде, илму-технология бёлюмледе магъаналы соруула сюзгендиле. Алагъа власть органла, уллу вузланы ректорлары, алимле, предпринимательле, студентле, устазла, окъуучула эм ата-анала да къатышхандыла. Алай бла «Приоритет-2030» деген къырал программагъа жораланнган тематиканы чеклеринде кибер къоркъуусузлукъ, билим бериу робототехниканы рыногу, окъутууда жангы амалла, сеть байламлыкъланы кючлеу эм башха шартла сюзюлгендиле. 

Эсге сала айтсакъ, Къабарты-Малкъар къырал университет СКФО-да даражасы жюрюген билим бериу учреждениягъа саналады эм Россейни жюз эм иги вузну тизмесине киреди.  

КъМКъУ РФ-ни Билим бериу эм илму министерствосуну «Приоритет–2030» программасына тири къатышады. Бюгюнлюкде университетде къыралны 50 субъектинден эм 48 тыш къыралдан 18 мингден аслам студент, аспирант, ординатор окъуйду.