Жангы бёлюм ачыллыкъды

Къабарты-Малкъарны республикалы  клиника больницасыны   мурдорунда  биринчи кере нейрореабилитацияны бёлюмю ачыллыкъды.  Бюгюнлюкде аны бла байламлы бийик технологиялы Lokomat комплекс да  алыннгынды.

КъМР-ни Саулукъ сакълау министерствосундан билдиргенлерича,  «Саулукъну теркирек кючлерча  медицина реабилитация“ деген федерал  проектни чеклеринде  Республиканы клиника больницасында  нейрореабилитация бёлюмню ачаргъа онг табылгъаны кёплеге ахшы себеплик этерикди.  

Комплексге автомат халда, специалист этерик жумушланы кеси тамамлайды эм саусузну болумуну юсюнден тюз шартла билдиреди.   Ол амал  курсланы бардырыргъа  энчи программаны  сайларгъа болушады. Жангы медицина оборудованияда саулукъларын операциядан сора келгенле  неда  нерва системалары ауругъан онгсузла кючлерге боллукъдула. Бюгюнлюкде  быллай амал кёп жерде  жокъду.

Эсге сала айтсакъ, «Саулукъну теркирек кючлерча  медицина реабилитация“ федерал  проект былтыр ишлеп башлагъанды. Аны айнытыргъа 2022—2024 жыллада 60 милилард сом бёлюнюрюкдю эм сагъынылгъан  болушлукъ субъектлени  барында да  берилирча мадар этилликди.  Аны бла байламлы тийишли оборудование бла 400 аслам регион эм 60 федерал медицина учреждение жалчытылынырыкъды.

Бёлюм быйыл февральда ишлеп башларыкъды. Республиканы инсанлары  реабилитацияны  ОМС полис  бла хакъсыз ётерге боллукъдула.