Тыш къыралгъа барырдан алгъа борчунгу тёле

Сюд приставланы федерал службасыны  управлениясы (ФССП) бла   Цифралы айнытыу эмда аслам  коммуникацияла жаны бла министерствону башламчылыгъы бла  «Госуслуги» порталада  «Ход снятия ограничения выезда из России» деген жангы сервис ишлеп башлагъанды.  Аны  хайыры бла  борчлары болгъан инсанла къыралдан тышына чыгъаргъа чек салыннганын «Энчи кабинетлеринде» кёрюрге боллукъдула. Дагъыда «Цифровое исполнительное производство»  къошакъ сервисде уа  сюд пристав къаллай оноу чыгъаргъаныны юсюнден толуракъ билдирилликди.  

ФССП –ны сервислеринде инсанла кеслерини борчларыны, чекле салыннганларыны юсюнден билгенлеринден сора да, тёлерге  онглары боллукъду.  

Эсге сала айтсакъ, 30 минг сом берлиги болгъан  тыш къыралгъа чыгъаргъа жарамайды. Болсада бир  къауум категориялы  производство бла байламлы  10 минг сом борч этилсе да  чек салынады. Сёз ючюн, алиментлени  заманында бермесе, биреуленнге аманлыкъ этип тазир тёлерге тюшсе эм башхала.

Аны бла бирге борчлу инсан документде  айтылгъан кезиуден эки айгъа кеч къалса сюд пристав он мингден аслам борчу болгъанны  къыралдан тышына жибермезча чек салыргъа эркинди.
 

Алай бла быйыл алты айгъа  Къабарты-Малкъарда жашагъанланы арасындан Россейден  тышына чыгъаргъа жарамагъанланы саны  73,3 минг адамгъа жетгенди.  Биринчи июльну эсеплерине кёре,  аладан  эки тенгинден бирине къыралдан чыгъалмазча  чек салыннганына бегим этилгенди.