Россейде предпринимательствону тарыхыны юсюнден олимпиада

Россейде предпринимательствону тарыхыны юсюнден бардырылгъан Битеуроссей сегизинчи олимпиаданы бизни республикада ётген кесегинде хорлагъанланы бу кюнледе саугъалагъандыла. Аны бла байламлы къууанчлы жыйылыу Къабарты-Малкъар къырал аграр университетде бардырылгъанды, деп билдиргендиле вузну пресс-службасындан.

Олимпиадагъа студентле бла аспирантла къатышыргъа эркин эдиле. Быйыл аны 40 адам ётгенди. Ала юч сагъатны ичинде алты кесекге бёлюннген тестлени жазгъандыла. Жаш тёлю бу жол предпринимательствону тарыхыны, белгили адамланы, предприятияланы эмда аланы атларыны юслеринден соруулагъа жууапла берирге керек эдиле. Андан сора да тематикалы кроссвордну тамамларгъа эмда белгиленнген темаладан биринден эссе жазаргъа тюшгенди алагъа.   

Алай бла эришиулени эсеплерине кёре, биринчи жерге КъМКъУ-ну тёртюнчю курсуну окъуучусу Алина Кумыкова бла КъМКъАУ-ну экинчи курсуну студенткасы Мурачаланы Салима чыкъгъандыла. Экинчи жерге КъМКъУ-ну окъуучусу Атталаны Бэлла тийишли болгъанды, ючюнчюню уа аграр вузну окъуучусу Тлупова Камилла алгъанды.

Конкурс комиссияны эмда «Иш кёллю Россей» жамауат организацияны келечилери Елена Давыдова бла Энейланы Алёна хорлагъанлагъа дипломла эм сертификатла бергендиле. Олимпиаданы къураргъа эмда бардырыргъа болушханланы къолларына уа Ыразылыкъ письмола тутдургъандыла.

Олимпиаданы регион кесегинде хорлагъанла Москвада бардырыллыкъ финалгъа Къабарты-Малкъарны атындан къатышырыкъдыла. Ол а РФ-ни Президентинде Россейни халкъ мюлк эмда къырал къуллукъ академиясында (РАНХиГС) 28-29 апрельде ётерикди.