Ала энди кадетледиле!

Бабугентде генерал-лейтенант Деппуланы Х.С. атлы 2-чи номерли кадет школа-интернатда кадетлеге алыуну байрамы бардырылгъанды. Сынам заманны тийишли ётдюрген 51 жашха ол кюн «кадет» деген ат берилгенин бизге мектепни устазы Аттоланы Халимат билдиргенди.

Бу магъаналы жумушха къатышыргъа КъМР-ни жарыкъландырыу, илму эм жаш тёлюню ишлери жаны бла министрни орунбасары Анзор Борукаев, ФСБ-ны запасдагъы генерал-лейтенанты Аттоланы Борис, РФ-ни Сауутланнган кючлерини запасдагъы офицерлерини «Мегапир» ассоциациясыны республикада бёлюмюню председатели Атайланы Жашарбек, Нальчикде ОВД-ны эм ВВ-ны ветеран советлерини таматасы Феликс Эфендиев, чыгъармачылыкъ интеллигенция, районну эм элни жер-жерли администрацияларыны адамлары, ата-анала келгендиле.

Ол кюн мектепни тийреси омакъ жасаланнганды, тёгерекде школ эм аскер жырла эшитилгендиле. Россейни гимни эшитилгенде, байракъны тутхан къауум арагъа чыкъгъанды, алгъышлау сёзню школну директору Эристауланы Абдурахман айтханды.  

- Бу сизни Ата журтубузгъа берген биринчи антыгъызды. Аллыгъызда кенг жолла ачыладыла, ала жарыкъ болсунла. Кадетни атын жюрютген тынч тюйюлдю, анга тийишли болургъа итинигиз. Хар затны баш мурдору билим болгъанын унутмагъыз, антыгъызгъа керти болугъуз, - дегенди ол.

Ант этиу окъулгъандан сора кадетлеге аланы биринчи удостоверенияларын тутдургъандыла. Жыйылгъан къонакъла да жашланы алгъышларгъа ашыкъгъандыла.

- Кадет ол, бек биринчиден, Ата журтну къоруулаучуду, келлик заманны аскерчиси, офицериди. Андан сора да, аны бийик жууаплылыгъы, низамлылыгъы, окъуу, кючю, болушургъа итиниулюгю болургъа тийишлиди. Сиз келлик кюнде къыралыбызны тийишли инсанлары боллугъугъузгъа ишексизме, - дегенди Аттоланы Борис.

Жашланы алгъышлап, аланы патриот сезимлерине къууанып, аскерчи форманы кийгенден сора кеслерин анга кёре тийишли жюрютюрге борчлу болгъанларын Атайланы Жашарбек да чертип айтханды. Ата-анала уа мектепни таматаларына эм устаз къауумуна ыразылыкъларын билдиргендиле.

Жыйылыу жыр, назму айтыула, тепсеуле бла ахырына жетгенди. Бу эсде къаллыкъ жарыкъ тюбешиу бабугентчи кадетлени жюреклеринде сакъланырыкъды, берген антларыны сёзлери да келлик кюнде Ата журтну къоруулаучу болур ючюн аладан къаллай итиниулюк изленнгенин шарт белгилейдиле.