Экономиканы айнытыуну къайгъсын кёре

Кёп болмай Къабарты-Малкъар къырал университетде вузну 90 –жыллыгъына  аталып  «Бюгюнлюкде экономика бла байламлы магъаналы  соруула» темагъа   халкъла аралы конференция болгъанды.
Жыйылыуну ача,  университетни ректоруну къуллугъун толтургъан   Юрий Альтудов  конференцияны магъаналылыгъыны юсюнден  айтханды.   

Ол  коронавирус бла байламлы  пандемия эм  санкцияла да  жангы амалла излерге итиндиргенлерин, быллай кенг эксперимент  урунуу рынокну да    тюрлендирмей къалмазлыгъын  билдиргенди.  Конференцияда  кётюрюлген соруула  жер жюзюнде эм къыралда да экономиканы айнытыугъа,   илму-излем ишлеге эм  студентлеге да  ахшы себеплик этериклерин  да чертгенди.  

КъМКъУ-ну илму-излем иш жаны бла проректоруну орунбасары  Фатимат Нахушева бюгюнлюкде жангы болумланы  кезиуюнде, экономиканы  айнытырча, Россейни бла тыш  къыралланы арасында  байламлыкъны кючлеуде, форумну уллу магъанасы болгъанын  билдиргенди. Анда  кёп тюрлю проблемала кётюрюледиле, илму-излем  жаны бла  иш бардырылады.  Бу жаны бла  аспирантланы, докторланы, магистрлени, предприятияла бла   организацияланы специалистлерини да къошумчулукълары уллуду.  Жыл сайын аланы санына къошула баргъаны уа бютюн игиди.  

Бу жол конференциягъа заочно халда  къатышханла:  Индонезияны, Къытайны, Польшаны, Молдованы, Латвияны,  Арменияны,  Беларусьну, Азербайджанны, Туркменистанны, Узбекистанны, Къазахстанны, Луганск эм Донецк халкъ республикаланы келечилери къатышхандыла. Алай бла алты жюз чакълы автор беш жюзден  аслам  статья жибергендиле.  

Узбекистанны Коканд шахарындан  инновациялы билим берген  эм хунерли  студентле бла  ишлеген араны таматасы,  педагогика илмуланы кандидаты, доцент Муборак Ганиев айтханнга кёре, бюгюнлюкде  экономиканы айнытыуда    социал –экономика, политика-право   жаны бла сорууланы  эсге алмай жарамайды.  Индонезияны Тазкия университетини  Ислам экономика колледжини  ректору  Мурниати Мухлисин да  жер жюзюню эм регион экономикаланы  айнытыуда проблемаланы сюзюуню магъаналыгъа санагъанды эм,  бирлешип, амалла излерге чакъыргъанды.   

КъМКъУ-ну информация технологияла эм экономика колледжини  таматасы Залина Этуева  да бюгюнлюкде орта профессионал  билим берген учрежденияла  илму-излем жаны бла тири кюрешип башлагъанларын билдиргенди.   КъМКъУ-ну халкъла аралы билим бериу  школуну  таматасыны орунбасары    Владимир Афаунов  экономиканы айнытыуда  къыралланы арасында билим бериу эм илму бёлюмледе байламлыкъ жюрютюуню болмагъанча    магъаналы шартха санагъанды.   Ол санда Къабарты-Малкъар халкъла аралы байламлыкъла къурау  жаны бла тири ишлегенин, бу жолгъу конференция да анга шагъатлыкъ этгенин эсге салгъанды.    

- Форум  арада  байламлыкъла  къураргъа аламат онг тапдырады. Ол санда бу жол  Узбекистанны  бла  Индонезияны  билим бериу учреждениялары бла  бирге ишлерча   келишимле  этилгендиле.  Алай бла бюгюнлюкде  халкъла аралы организацияла бла 21 келишим этилгенди, ол санда   17 университет бла.  Мындан арасында «Приоритет 2030» проектни чеклеринде  студентле бир бирге барып окъурча, илму-излем эм башха къыйматлы  проектлени  бардырырча себеплик этерикбиз,-  деп къошханды   Владимир Афаунов.

 Форумну  видеоконференция халда баргъан  пленар кесегинде модераторланы орунунда уа  информация - технологияла эм экономика колледжини келечилери Текуланы Марина, Лиана   Жекамухова преподавательле Анна Алоева  ишлегендиле. 

Саулай алып айтханда, форум къыйматлы болгъанды.  Анда кётюрюлген соруула бла проблемала  кёплеге себеплик этериклери да баямды. Мында окъулгъан докладла эм жиберилген статьяла да конференцияны  илму ишле жаны бла  жыйымдыкъ китабына кирликдиле.