Халаллыкъды баш жорукъ

Нальчикде 20 апрельде Донорну кюню белгиленнгенди. Къан бериу станцияны машинасы  Къабарты Россейге къошулгъаныны 400-жыллыгъыны майданына келгенлей, кеси ыразылыкълары бла къанларын саусузлагъа берликле да жыйылгъан эдиле. Врач-трансфузиолог Хубийланы Мадина республикада халал адамла жашагъанларын чертгенди, солуу кюн битеу юйде ишлерин къоюп, къан берирге келгенлерин белгилеп. Алагъа аны ючюн ахча тёленмейди, алай станцияда донорланы хакъсыз аш-суу бла жалчытадыла.

Хубийланы Мадина айтханнга кёре, бусагъатда республикада донорла кёп болгъанлары себепли, къан жетеди, кёп регионлада уа хал башхаракъды. Бизде да бир заманда къытлыкъ сезилип тургъанды. Ол жыллада Байсыланы Темиржан жамауатда ангылатыу иш бардыргъанды, кеси да тенглери бла къан берип тургъанды. Черек районну администрациясыны башчысыны болушлукъчусу Байсыланы Харун 2012 жылда «Донор» деген клубну къурагъан эди. Бусагъатда анга беш жюз адам киредиле.  Харун Магометгериевич донор ишни айнытханы ючюн 2018 жылда майдал бла саугъаланнганды, былтыр а КъМР-ни Саулукъ сакълау министерствосу аны къыйынын Сыйлы грамота бла белгилегенди. «Жамауат бирлешсе, къолундан келмезлик жокъду. Саусузланы къан бла жалчытыу бизни борчубузду», - дегенди Байсыланы Харун.