Абаданланы къайгъыларын эте

2012 жылда «Урушну сабийлери» Битеуроссей жамауат организация къуралгъан эди. Аны баш борчу урушну сабийлерини жашау болумларын игилендириу болгъанды,  1928-1945 жыллада туугъанла къыралны къайсы даражада уруннган къуллукъчулары да алагъа  эс бурурча.

Ол жылланы адамлары асламысы сакъатла, пенсиячыладыла. Бу организация алагъа бир тюрлю болушлукъ этер эсек деп кюрешедиле. Бизни республикада да барды аланы бёлюмлери. Аны таматасы Замир Канаметовду. Бизни бла ушагъында ол былай дейди:

- Урушну сабийлерине ахча болушлукъ этигиз деп, Къырал Думагъа тогъуз кере къагъыт жазылгъанды. Алыкъа андан жууап келмегенди. Алай биз аны бла чекленип къаллыкъ тюйюлбюз,  ол жумушну бардырлыкъбыз. Алгъаракъда слёт болгъан эди да, андан республиканы Башчысы Казбек Коковха къагъыт жиберген эдик. Энди  да болушлукъ сакълайбыз.

Замир Канаметов айтханнга кёре, бу организацияны  республикада он бёлюмю барды. Хар районда, сора Нальчик шахарда. Шахардагъыны таматасы Улбашланы Светланады. Ай сайын, квартал сайын Светлана нёгерлери бла урушну сабийлерини юйлерине барып, халларын тинтедиле. Алгъаракъда уа майдалла да бергендиле.

Элледе организацияла да бош турмайдыла. Администрацияланы келечилери бла мектеплеге барадыла. Школчула бла ушакъ этедиле, ала бла ангылатыу ишле бардырадыла. Андан сора аланы назмула окъугъанларына, жыр айтханларына тынгылайдыла. Окъуучуланы пионерлеге алгъан заманлада да анда боладыла. Къысха айтханда, мектепле бла байламлыкъ жюрютгенлей турадыла андан сора да, миллет организацияла бла. Бизни республикада уа аллайла аз тюйюлдюле.

Светлана Исмаиловна: «Дагъыстанда санаторийге солургъа, жыл сайын ол къауумдан кёплени жибере турабыз. Анда саулукъларына да бакъдырып, солугъан да этип, къууанып къайтадыла», - дейди.

«Урушну сабийлери» Битеуроссей жамауат организацияны Къабарты-Малкъарда бёлюмю ол къауумну адамларына къолларындан келгенлерича, онгларына кёре  болушадыла.