Кёк отлукъ ючюн тёлемегенледен къаты суралады

Былтыр газ бла жалчытхан «Газпром межрегионгаз Нальчик»  биригиу кёк отлукъ ючюн аслам заманны тёлемей тургъан организацияла  бла энчи иелилеге 2 миллиард бла 804 минг сом чакълы  борчларын жабарча сюдлеге  36838 иск бергенди.

Бюгюнлюкде сюд къарагъандан сора, 2 миллиард бла 198 минг  сомгъа  иск къабыл этилгенди. Аны хайыры бла  организацияладан 963  миллион эм  энчи иелиледен 449 миллион  сомну алыргъа онг табылгъанды.

Аны бла бирге борчлары болгъан абонентлеге тёлерге ашыгъырларын айтып, элли мингден  аслам билдириу этилгенди.

- Абонентлени  газ бла жалчытыу жумушну компания толусунлай толтурады. Ол себепден хайырланыучуланы жанындан да  аллай жууап излейбиз. Борчларын дау бла алыргъа, ишлерин  сюдлеге жетдирирге  сюймейбиз. Аз-аздан тёлерге жарагъанын эслерине салабыз. Былтыр ол амалны  алты мингден артыкъ адам хайырланнганды.  Болсада бир-бирлени уллу кёллюлюклери  ючюн, онгларгъа   жаланда право амалны кючю болушады,- дейди   «Газпроммежрегионгаз Нальчик» биригиуню таматасы  Залим Вороков.

Интернетни себеплиги бла-приёмгъа

«Газпром межрегионгаз Нальчик» биригиуню таматасына  Залим Вороковха интернет-приём буруннгу жыл  жайдан бери ишлейди.

Электрон амал бла берилген  обращенияла   автомат халда документча   сакъланадыла эм  тийишли бёлюмлеге бериледиле.   Жууап хазыр болса, инсанны электрон почтасына  неда письмо бла жашагъан жерине жибериледи. 

 - Биз хайырланыучула бла байламлыкъны кючлерча   аслам эс бурабыз.   Интернетни амалы бла приём бардырыу да аладан бириди. Сервисни хайыры бла абонент,  кезиуюн сакъламай, къагъытла хазырлай турмай, сорууун не заманда да болса бераллыкъды,- дейди «Газпром межрегионгаз Нальчик» биригиуню таматасы  Залим Вороков.

Электрон халда сорууларын абонентле эм   биригиуню келечилери да бераллыкъдыла. Хайырланыучулагъа таплыкъгъа соруула тематикаларына кёре юлешиннгендиле:  газ бла жалчытыу эм аны ючюн тёлеу, производствода къоркъуусузлукъ, тарыгъыула эм оюмла. Интернет бла приём биригиуню  сайтында  бу адрес бла бардырылады:  http://www.mrgkbr.ru

Сервислени  тири хайырланадыла

Арт кезиуде «Газпром межрегионгаз Нальчик» биригиуню  абонентлери дистанциялы  сервислени  тири хайырланадыла.  Бусагъатда биригиуню сайтыны неда «Мой Газ» мобиль приложенияны хайыры бла  тюзюнлей  халда эсеплеген приборлада кёрюмдюлени  тинтирге эм хайырланылгъан газ  ючюн комиссиясыз  тёлерге онг барды.     Аны бла бирге  сервисни хайыры счётунда болум бла шагъырейленирге энчи кабинетге  башха счётланы къошаргъа, ата-аналарыны, сабийлерини эм ахлуларыны  расчётларын билир ге жарайды. 

 - Жангы сервислени  сайлагъанланы санына танг кесек къошула барады. Башха къыйматлы онгла бла бирге «Мир» карта бла тёлегенле кешбэк къоллу боладыла. Быллай  акция быйыл мартны ахырына  дери ишлеригин да белгилерчады,- деп билдиргендиле  «Газпром межрегионгаз Нальчик» биригиуде.

Кёп сакъларгъа тюшмезча

Белгилисича, «Газпром межрегионгаз Нальчик» жангы ишинде    информациялы  технологияланы сингдириуге аслам эс бурады. Ол  санда буруннгу жылдан бери  кёк отлукъ бла байламлы жумушлагъа къарагъан Бир арада ол буруннгу жылдан бери хайырланады. Бир тюрлю жумушлары бла офислеге келгенле кёп сакъламазча  «акъыллы» система болушады.   Кёп болмай  аллай онг Нальчикде бла Элбрус районда абонент пунктлагъа да тапдырылгъанды.

Кезиуюн сакълагъан терминалны себеплиги бла   къайсы жумуш бла келгенин билдираллыкъды.  Ала  аппаратны сенсорунда жазылыпдыла. Керек позициягъа басхандан  сора  талон бериледи. 

- Бизни баш борчубуз   участокга келген инсанлагъа   тап болурча этергеди.  Ол себепден цифралы технологияланы айнытыргъа, клиентлени санын да кёбейтирге итинебиз. Бюгюннгю технологияла  ишни теркирек эм тынгылы  тамамларгъа болушадыла. Келир заманда аллай установкала биригиуню башха участокларында да жарашдырыллыкъыла деп къошханды «Газпром межрегионгаз Нальчик» биригиуню жамауат бла байламлыкъ жюрютген бёлюмюню таматасы Виктория Михайлюк.

Къагъытны орунуна - электрон квитанция

Бюгюнлюкде Къабарты-Малкъарда  кёк отлукъну хайырланнган  абоонентлени жыйырма процентине къагъыт орунуна   электрон квитанцияла келедиле.  Андан сора да, былтыр борчлары болгъанына 184 мингден аслам  СМС билдириу этилгенди.

 Алай бла биригиу ай сайын аллай 5-18 минг эсгертиу ашырады. Бирле юйден чыгъыргъа онглары болмагъанын неда анга заманларын къызгъаннганларын  айтып жарсыйдыла. Болсада энди хуржунда жюрютюлген телефонда   «Мой ГАЗ» неда  «Газ- онлайн»  приложенияла бла  тёлерге онг барды. Ол жумушну биригиуню сайтында www.mrgkbr.ru               

«энчи кабинетге» кирип да этарчады. 
 

 Электрон квитанцияны  энчилигини юсюнден айтханда, ол   абонентге къысха заманда жибериледи, тас болмайды,  электрон почтада сакъланады. Аны сагъынылгъан приложениялада неда биригиуню  сайтында табаргъа боллукъду.