Окъуучулагъа хайырлы тренинг

Къабарты-Малкъар къырал аграр университетни механизация эмда предприятияланы энергия бла жалчытыу факультетинде жер сюрген машиналаны тинтиу жаны бла тренинг бардыргъандыла. Анга алимле, окъуучула да къатышхандыла, деп билдиргендиле вуздан.

Тинтиуню башлардан алгъа эл мюлкню механизациясы кафедраны келечилери Анзор Болотоков, Габаланы Алий эм Владислав Мишхожев окъуучуланы топуракъны къаллай тюрлюлери болгъаны бла шагъырейлендиргендиле, жер сюргенде не тюрлю амалланы хайырланыучуларыны юсюнден да тынгылы хапарлагъандыла. Студентле гатон, тырнаучу эмда топуракъны жумушатыучу сауутла къалай ишлегенлерин кёргендиле, жерни мылылыгъына, къатылыгъына, къазгъан теренлигине кёре трактор аланы нечик терк созаргъа боллугъун да билгендиле. Айтылгъанны ишни юсюнде кёргюзтюп ангылатырча, студентлени кафедраны лабораториясына киргизтип, ала бла бирге тинтиуле да бардыргъандыла.