Маданият эм искусство жаны бла ишлегенлеге – энчи себеплик этиу онгла

Къабарты-Малкъар Республиканы Башчысы Казбек Коков театр грантланы эм маданиятны бла искусствону ишчилерини стипендияларыны ёлчемлерин эки кереге кёбейтгенди.  Тийишли указла КъМР-ни Башчысыны сайтында басмаланыпдыла.

«Къабарты-Малкъар Республиканы Башчысыны театр искусство жаны бла грантланы къурауну юсюнден» Къабарты-Малкъар Республиканы Президентини 2011 жылда 7 октябрьде чыгъарылгъан 140-УП номерли Указына эмда «Маданият эм искусство жаны бла къырал стипендияланы юсюнден» Къабарты-Малкъар Республиканы Башчысыны 2014 жылда 16 октябрьде чыгъарылгъан 211-УГ номерли Указына тюзетиуле кийирилгендиле.

Театр грантланы ёлчемлери хар бирини 500 минг сомдан бир миллион сомгъа дери ёседиле. Маданиятны бла искусствону фахмулу ишчилерини, хунерли жаш авторланы эм жырчыланы, маданият эм искусство жаны бла ишлегенлени эм чыгъармачылыкъ жаш адамланы стипендияларыны ёлчемлери ай сайын къауумлагъа кёре 6000, 4000 эм 3000 сом боллукъдула. Культура жаны бла ишлегенлени стипендиялары республиканы Башчысыны указына кёре 2020 жылда мартда да кётюрюлген эди.

Дагъыда тепсеу искусство эм симфония музыка жаны бла жангы грантланы къурауну юсюнден указла да КъМР-ни Башчысына къол салдырыргъа хазырланадыла. Указгъа тийишлиликде тепсеу эм музыка коллективлени чыгъармачылыкъ проектлерине къырал себеплик этерча Къабарты-Малкъар Республиканы Башчысыны жыл сайын берилген тёрт гранты къураладыла, хар бири бир миллион сом ёлчемде.  Андан сора да, Къабарты-Малкъар къырал филармонияны Симфония оркестрини жаш музыкачыларына болушлукъ этерча документге къаралады.

Игилендириу жумушла 700 чыгъармачылыкъ ишчи чакълы бирге тапдырыллыкъдыла. Культура эм искусство жаны бла себеплик этиу амалла  КъМР-ни Башчысы Казбек Коковну  республиканы маданият ишчилери бла былтыр декабрьде  къуралгъан тюбешиуюню эсеплерине кёре кийириледиле.