Биригиулюк бла жууаплылыкъ – жетишимликни мурдору

Устазны бла насийхатчыны жылы

Бичиланы (Аналаны) Танзиляны  эрттеден таныйма. Биз университетге    бирге кирген эдик. Андан бери къыркъ жылдан атлагъанды, алай, сёлешип, хапарыбызны билирге сюйюучюбюз. Ишни юсю бла да тюбей туруучубуз.
Танзиляны  Хасанияда танымагъан хазна адам болмаз. Ол анда  74-чю сабийи садда 1981 жылдан бери ишлейди.  Ишчи нёгерлерини араларында да намысы жюрюйдю.

  - Бир юйюрча турабыз. Солуу кюнледен сора  ашыгъып келеме ишчи нёгерлерими кёрюрге. Бизни  бир-бирибизге сакъ болгъаныбыз, билеклик этип тургъаныбыз да таматабыз Ёлмезланы Зайнафны ( Хочуланы Таукъанны къызы) хайырынданды. Ол бек алгъа бизни бир-бирибизге тюз ниет бла, таза жюрек бла  къарарыбызны сурайды. «Бир-бирге иги болмасагъыз жарарыкъ тюйюлдю. Бизге сабийлени ышанадыла, аланы аманат этедиле»,-деп, эсгертгенлей турады,- дейди Танзиля.

Мында сабийлени кёп болгъанлары да  къууандырады. Бери шахардан да келтиредиле балачыкъланы. «Ол а даражабызны кётюреди. Ненча тёлю алышыннганды мен мында ишлегенли. Бери жюрюген ата-анала энди  кеслерини сабийлерин келтиредиле»,-дейди Танзиля.

Ашлары-суулары да бек аламатды. Эки кюнню бир азыкъ этмейдиле. Тюрлю-тюрлю ашарыкъла, андан тышында -  кёгетле, татлы затла.  Ол затларына сакъ болгъанларына   ата-анала да  бек ыразыдыла. 

Кёбюсюнде ата-анала ишлеген этедиле, эртте да келтирирге тюшеди сабийлени садха, кечирек алыргъа да тюшеди. Ол затны да ауурсунмайдыла мында ишлегенле. «Бир бирибизни танымагъан билмеген жокъбуз , аны себепли бир-бирге жууукъча къарайбыз», -  дейди Танзиля бизни бла ушагъында.

Ол ата-аналагъа да ыразылыгъын билдиреди. «Коллективде адамны керек кюнюнде барыбыз да къатында болабыз. Сабийлери бизге жюрюген атала бла анала да аллай жумушлагъа табынып къаладыла. Ол а барыбыз да бир низамда, бир умут бла, сабийлеге иги болсун, деген оюм бла жашагъаныбызны, ишлегенибини шагъатыды. Бир бири  бла байламлыкъ ишибизге иги себеп этеди. Сабийлеге бир байрам этебиз десек да, ата-анала жангыз угъай, аппала бла аммала да туудукъчукъларын кётюрюге бек  сюедиле, ол да бизни бек къууандырады, ишге кёллендиреди. Ишибизни жаратсала, бизге да бек игиси олду»,-дейди ушакъ нёгерибиз.

 - Танзиля, заманны артха буруп къарасанг, ишлерге къайры барлыкъ эдинг?- деп сорама .

 - Кесими мындан  башха жерде кёрмейме.  Ишими бек алгъа салама жашауда. Билемисе, хар сабийни аты бла билеме. Барын да кесимикилеча багъалайма. Сабий жюрекчикле алай тазадыла, халалдыла. Ала юйде болгъан хар затны да айтыргъа да бек сюедиле. Танг атып, кёзлерими ачханлай, олсагъат ишиме ашыгъып тебирейме, хар бирине энчи тансыкъ болама, - дейди Танзиля.

Сора дагъыда жылла озуп, бу садха жюрюгенле уллу къызла, жашла болуп  бийик  жетишимлеге жетселе, алагъа да кеси сабийлеринеча къууаннганын айтады ол.  Къаллай насыбды адамгъа ишин алай сюйген.    Мен да Танзиля бла ушакъ этип чыгъып келе,  бир иги тенгим, Хасанияда жашагъан  Байсолтанланы Сонягъа тюбейме. Ол да туудукъчугъуну къолундан тутуп келе тура эди. Келгеними сылтауун айтханлай: «Билемисе , шахарда не иги садха да бераллыкъ эди, алай ма мынга жетген  жокъду,-дейди. - Мен аны иги билеме да андан айтама алай. Мени сабийлерим жюрюгендиле заманында бу садха, энди аладан туугъанланы келтиреме. Ийнанамысыз, ингирде юйге келирге окъуна унамайдыла.

Танышым бу учрежденияда ишлегенлеге ата-аналаны атларындан ыразылыгъын билдирип, газетде жазарымы тилегенди.  «Аны таматасы Хочуланы Зайнафны, тамата юйретиучю Аналаны Танзиляны, аладан сора Нёгерланы Розаны, Гузеланы Лейланы, Киштикланы Фаризатны, Асанланы Люданы, Агайланы Светаны, Хочуланы Фатиманы, ашханада эрттеден бери ишлеген Мирзойланы Галинаны эм кёп башхаланы атларын жаланда махтау бла сагъыныргъа боллукъма. Жюреклерибиз сабийлерибиз ючюн бек ырахатдыла»,-дегенди.