Газ бла жалчытыуда – ахшы кёрюмдюле

Кёп болмай Россей Федерацияны Правительствосуну  Председателини орунбасарыны Александр Новакны башчылыгъы бла  Газ бла жалчытыу федерал штабны кенгеши болгъанды. Анга КъМР-ни промышленность, энергетика эмда сатыу-алыу министри    Шамиль Ахубеков эм  «Газпром газораспределение Нальчик» биригиуню газ бла жалчытыу службасыны таматасы Ляна Эристова да къатышхандыла.

Тюбешиуде догазификация программа бла байламлы  2021 - 2022 жылада тамамланнган  жумушлагъа къаралгъанды. Аны бла бирге келир жылда  энтта да энчи арбазланы, медицина,  билим бериу организациялагъа  газ тартырча  онгла сюзюлгендиле. Энчи категориягъа уа бу жаны бла  социал болушлукъ этилирге кереклиси да эсгертилгенди. 
Къабарты-Малкъар битеуроссей рейтингде   догазификацияны  бардырыу бла ахшы кёрюмдюлеге жетгени да белгиленнгенди. Сёз ючюн, бюгюнлюкде республикада 180 элден  172-де газ ызла тартылгъандыла. 

Быйыл бу айны эсеплерине кёре,  1585 берилген заявкадан   1564-сю неда 98 проценти къабыл этилгени ачыкъланнганды. Ол санда аланы 644-ню арабазларына дери  газ быргъы тартылгъанды.  

Эсге сала айтсакъ, догазификация программа РФ-ни Президентини  Владимир Путинни буйругъу бла бардырылады. Аны баш магъанасы  кёк отлукъ ётдюрюлген элледе быргъыны  хакъсыз  арбазлагъа  дери  тартырча мадар этергеди. Къолларындан келмеген танг кесек юйюрге  ол ахшы себеплик болгъанын да энчи чертирчады.