Башламчылыкълары - грантлагъа тийишлиле

Жаш тёлюню ишлери жаны бла федерал агентствода жаш тёлю проектлени Битеуроссей конкурсуну комиссиясыны кенгеши болгъанды. Анда бу (заочно халда ётген) эришиулени эсеплерин чыгъаргъандыла. Хорлагъанланы санында Къабарты-Малкъар къырал университетни келечилери да бардыла, деп билдиргендиле вуздан.

Эсге сала айтсакъ, конкурсха къатышыргъа сюйгенледен «Россейни жаш тёлюсю» деген системада заявкаланы алыу быйыл 28 апрельден башлап 29 майгъа дери баргъанды. Анда битеу да 85 региондан 8611 проект кёргюзтюлгенди. Эксперт комиссияны оноуу бла аладан 820 дурус кёрюлгенди. Къабарты-Малкъардан жюз чакълы заявка берилген эди да, аладан тогъузун къабыл этгендиле. Ол санда  тёртюсю КъМКъУ-дан берилгендиле; бу проектлени барына да 3,6 миллион сом бла себеплик этилликди.

Алай бла вузну юйретиу иш эмда жаш тёлю политика управлениясыны башчысыны орунбасары Хажмухамед Этуев «Комплекс мероприятий «PROFориентир» деген проектине эки миллион сом алгъанды. «Филология. Орус тил эм литература» факультетни ючюнчю курсуну студенткасы Елизавета Хуторская уа - «Жаш педагогланы «Призвание» деген биринчи регион билим бериу форуму» деген башламчылыгъына 800 минг сом.  

«Менеджмент» эм «Юриспруденция» бёлюмледе магистр Георгий Савельевге «Къабарты-Малкъар Республиканы жаш тёлюсюню медиакъоркъуусузлугъу» деген проекти ючюн 600 минг сом бергендиле. «Социал иш» бёлюмню магистри Тимур Арамисовха уа «Къабарты-черкес тилде сёлешиуден республикалы жаш тёлю турнирни» бардырыргъа 200 минг сом бла билеклик этилгенди.