Алимлерибизни ишлерине – бийик багъа

Кёп болмай «Алтын кюз арты -2022» - жыйырма бешинчи  битеуроссей агропромышленный кёрмючде Къабарты-Малкъар къырал аграр университетни алимлерини  проектлери  тогъуз майдалгъа тийишли болгъандыла. Ол илму-технология эм билим бериу, эл жерлени айнытыу, мелиорация эм жер бла байламлы политика эм къырал иелик жаны бла департаментлени кючю бла бардырылгъанды.  

Бу жол конкурсха чыгъарылгъан тюрлю-тюрлю отрасльле бла байламлы он илму  ишден тогъузусу майдаллагъа  тийишли болгъандыла.  Алай бла эл мюлк бёлюмге инновацияланы жетишимли сингдиргенлери ючюн  «Битимчилик жаны бла инновациялы онгла» эм «Эл мюлкде механизация, электрификация эм автоматизация жаны бла  инновациялы онгла» номинациялада жарашдырылгъан эки иш  алтын майдалла бла саугъаланнгандыла.  Андан сора да,  «Мелиорация жаны бла инновациялы онгла», «Агробиотехнология жаны бла инновациялы онгла», «Эл мюлк продукцияны жарашдырыу эм сакълау жаны бла инновацияла», «Тахталаны сугъарыу бла байламлы мелиорация амалны техникасын игилендирирча проектин бла техника амалын къурау» номинацияла уа  экинчи жерлеге тийишли болгъандыла.  «Малчылыкъ жаны бла къалгъан-къулгъанланы къурутууда экология эм аяулу агробиотехнологиялы  системаланы къурау» эм «Булкаланы производствосунда файдалы технологияны къурау» номинациялагъа кёре ишлеге  «доммакъла» берилгендиле.  

Эсге сала айтсакъ, «Алтын кюз арты» Россейде агропромышленный комплекс эм профессионал жаны бла да уллу эм магъаналы  кёрмючге саналады.   Жыл сайын анга къыралны регионларындан жюзле  бла производительле къатышадыла. Ала продукцияларын,  эл мюлк техникаларын, оборудованияларын эм технологияларын кёргюзтюрге эм коллегалары жангычылыкълары бла шагъырейленирге онг табадыла.