Хорлагъанлагъа – майдалла, саугъала да

Бу кюнледе   Май районда  жюзюуден  эмда шёндюгюлю пятиборьеден республикалы эришиуле болгъандыла. Ала  2005 жылны 13 октябринде  право низамны сакълаучу  органлада къуллукъ эте аманлыкъчыланы къолларындан ажымлы ёлгенлени хурметине къуралгъандыла. Алагъа 150-ден аслам адам къатышханды.

Спортчуланы алгъышларгъа эмда насийхат сёз айтыргъа  Май муниципал районну администрациясыны башчысыны социал иш жаны бла  орунбасары Ольга Бездудная,  ЛДПР партияны КъМР-де координатору Газаланы Масхут,  КъМР-де МВД-ны  право низамны сакълаучу органларында кёп жылланы ишлеп, солуугъа чыкъгъанына да къарамай, ветеранланы советинде да тири  къатышхан Азамат Гобеев,  МВД-ны Май районда  бёлюмюню таматасыны орунбасары  Ирина Кривая да баргъандыла.

Нальчик шахардан спортну жюзюу жаны бла жыйымдыкъ командалары  кубокла эмда майдалла ючюн къаты кюрешгендиле.     Датчиланы Тамерлан, Радион  Альбердиев  бла Денис Марков кеслерини жыл санларына кёре  бек иги  эсепле   кёргюзтгендиле.

Ол кюн дагъыда «Юность» стадионда  женгил атлетлени иги кесеги чабаргъа хазырлана тура эдиле.  Бу эришиуге Май районну жети школуну  командалары  къатышхандыла. Жылы кюнле  жаш спортчулагъа  ахшы кёрюмдюле болдурургъа, рекордла да салыргъа болушхандыла. Къызланы араларында биринчи жерге Майский шахарны 1-чи номерли гимназиясындан спортчула чыкъгъандыла.

Команда эсепде  Ново-Ивановское  элде Ш.Козуб атлы  7-чи номерли  лицейни  командасы хорлам болдургъанды.

Хорлагъанлагъа эмда экинчи, ючюнчю жерлеге тийишли болгъанлагъа да грамотала, майдалла эмда саугъала жетгендиле.  Газаланы Масхут эмда Азамат Гобенев  а  эришиулеге къатышхан эм кичи жашчыкълагъа бла къызчыкълагъа ЛДПР партияны атындан саугъала бергендиле.

Суратлада: Хорлам болдургъанланы Газаланы Масхут алгъышлайды; Эришиулеге къатышханланы къаууму; эришиуле баргъан кезиуледе.

Суратланы автор алгъанды.