Ишчи жерлени ярмаркасы боллукъду

Хурметли жамауат.

КъМР-ни Урунуу, иш бла жалчытыу эмда социал къоруулау арасы 25 октябрьде, кюндюз сагъат онда ишчи жерлени ярмаркасын бардырлыкъды. Ары келгенлеге вакансиялары болгъан предприятияланы, ишчилеге къаллай излемле болгъаныны юсюнден айтыллыкъды, айлыкъ хакъны, социал гарантияланы юслеринден да билдирликдиле.

Ярмаркагъа келген гражданланы профессионал эмда къошакъ билим берген программала бла да шагъырейлендирликдиле. Ол умутда бу жумушха коммерциялы болмагъан «Профессионал усталыкъны айнытыу агентство» (Ворлдскиллс) организацияны келечиси да къатышырыкъды. Къабарты-Малкъар Республиканы Предпринимательствогъа себеплик этиу арасы уа бизнесни бардырыу жаны бла консультацияла берликди.

Урунуу араны специалистлери иш излегенлеге къаллай онгла бар эселе да – барын да туура этерикдиле. Ол санда битеуроссей информациялы базада болгъан вакансияланы кёргюзтюрюкдюле, жашырын халда урунууну осаллыгъын да айтырыкъдыла.

Бу ишге КъМР-ни урунуу жаны бла Къырал инспекциясыны келечилери да къатышыргъа умутлудула. Ала ишчилени бла иш бергенлени араларында урунуу байламлыкъланы юсю бла чыкъгъан соруулагъа жууапла берликдиле.

Вакансияланы ярмаркасы, айтханыбызча, 25 октябрьде ма бу жерде ётерикди: Нальчик, Шогенцуков атлы проспект, 28, Къырал концерт зал.