Шашкачылагъа – усталадан дерс

«Ладья» шахмат клубда «Биз башхабыз, алай  тенгбиз» регион проектни чеклеринде биринчи дерсле бардырылгъандыла. Эсигизге салайыкъ, аны башламчысы Астемир Ивазовду. Ол проектни жашауда бардырыугъа ахчаны Жаш тёлюню ишлери жаны бла федерал агентствону Шимал-Кавказ федерал округда жаш адамланы проектлерини конкурсунда къытханды.

Проект саулукъларына кёре чекленнген онглары болгъан сабийлени жамауат жашаугъа сингдирир, тенгликни спортун кенг жаяр мурат бла къуралгъанды.

Дерсге уа Нальчикни школларыны эллиден аслам окъуучусу – жаш шахматчыла - келгендиле. Аланы спортну бу тюрлюсюню энчиликлерине тюрлю-тюрлю эришиулени чемпионлары   Чамал Гедгафов,   Фатима Шахмурзова,   Давид Темирканов юйретгендиле. Ала бу оюнну тарыхыны юсюнден айтхандыла, аны юсюнден къаллай китапланы окъургъа кереклисин  да билдиргендиле. Дагъыда белгили шахматчыланы оюнлары да тинтилгенди.

Дерследен сора сабийлени кёбюсю шахматла бла кюреширге сюйгенлерин билдиргендиле эмда кружокга жазылгъандыла.

Проектни чеклеринде кезиулю тюбешиу интернатлада бардырыллыкъды. Алада да шахматладан эришиулеге къатышыргъа сюйгенле сайланырыкъдыла. Оюнла Сакъатланы халкъла аралы кюнюне – 3 декабрьге – жораланырыкъдыла.