Элледе жолла мардалагъа келиширча

Бу кюнледе КъМР-ни Эл мюлк министерствосуну башчылыгъы бла  «Комплекс халда эл жерлени айнытыу» къырал программагъа кёре, тогъуз элде жоллагъа тынгылы ремонт этиледи.  Алай бла Элбрус, Черек, Май, Терк районлада биришер, Лескенде эки эм  Чегем районда юч элни  ара жоллары жангыртыллыкъдыла.

Саулай алып айтханда, быйыл 18,3 километр чакълы он автомобиль жолгъа къараллыкъды.  Аладан экисинде жангы кёпюрле да салынырыкъдыла. 

Жолланы барысы да администрацияла, амбулаторияла, мектепле, спорт залла эм башха учрежденияла орналгъан, агропромышленный комплекслеге, суу бла жалчытхан объектлеге  элтген социал-экономика магъанылыладыла.

Сагъынылгъан ишлеге 437,4 миллион сом бёлюнюрюкдю. Аны асламысы неда  430,7 миллиону федерал бюджетге жетеди. Къалгъанын а республика бла  муниципалитетле кеслеринден  къошарыкъдыла.

КъМР-ни Транспорт эмда жол мюлк министерствосундан билдиргенлерича, белгиленнген жумушла графикге тийишлиликде тамамланадыла.  Объектлени быйыл Къабарты-Малкъарны 100 -жыллыгъына бошар мурат этиледи.