Къурулуш бёлюмню таукел атламлары

Къабарты-Малкъарда къурулуш бёлюм андан ары айный баргъаны эсленеди. Алай бла быйыл ал беш айны ичинде республикада 150 минг квадрат метр берилгенди хайырланыугъа. Тенглешдирип айтханда, ол былтырны бу кезиуюнден эсе 39 процентге кёпдю. Саулай Россейде уа бу кёрюмдю 44,5 миллион квадрат метрге жетгенди. Ол да 2021 жылда биринчи беш айда ишленнген журтланы ёлчеминден 54,6 процентге аслам болгъанды, дегендиле республиканы Къурулуш эмда жашау журт-коммунал мюлк министерствосунда.

Сагъынылгъан жашау журтланы санында 110 минг квадрат метрин адамла кеслери ишлегендиле. Ол битеу да 741 юй болады. Кёп фатарлы жашау журтланы ёлчеми уа 40 минг квадрат метрге жетеди.

Ал тергеулеге кёре бизни къыралда быйылны ал жарымында ишленирик жашау журтланы ёлчеми 50 миллиондан артыкъ квадрат метрден атларыкъды. Къабарты-Малкъарда уа бу кёрюмдю 195 минг квадрат метрге жетерикди.

Министерствода айтханларына кёре, анга «Жашау журтла эмда шахарлада болум» деген миллет проект, «Эл тийрелени комплекс халда айнытыу» эмда льготалы кредитле бериу программала себеплик этедиле.