Сабийлени ариу халли, намыслы болурларына да къарайбыз

Холамханланы Исмайылны къызы Майя Бызынгыны мектебинде музыкадан бла технологиядан юйретеди. Ол, эм алгъа тау тил бла орус тилни сайлап, усталыкъны бу жаны бла алгъанды, Къабарты-Малкъар къырал университетни Филология факультетин тауусханды. Артда музыкадан бла технологиядан устаз керек болуп, квалификациясын тюрлендиргенди.

- Гитчеликден да устазлыкъгъа жюрегим тарта эди. Кесими устазларымдан кёп затха юйреннгенме. Педагогну борчу сабийни жангыз да предметине юйретиу бла чекленмей, аны абадан жашаугъа хазырлауду.  Тау элибизде адамлыкъны, намысны, ариу къылыкъны, ётюрюкден кери турууну бек багъалайбыз, биз да, устазла,  сабийлени ол халде юйретирге кюрешебиз, ала осал ниетлеге алданмазларына къарайбыз, - дейди Майя Исмаиловна.

Дерсде жангыз да кесини предметини юсюнден айтмай, аны башха илмула бла байламлыгъын кёргюзте билирге, аны юсю бла сабийни не жаны бла сагъыш эте, башха-башха затланы бирикдирген шартланы табаргъа  юйретирге тийишлиди. Музыканы юсюнден айтханда, ол, сёз ючюн, адабият бла къысха байламлыды, ансыз жыр болмайды, жангызда макъам къалады. Технологиялада уа биологияны, физиканы, естествознанияны эм талай башха предметлени ызлары тюбейдиле. Бу дерсде сабийлени къолдан усталыкълагъа юйретедиле, ала кеслери этген затланы конкурслагъа элтип, алчы жерлеге да чыкъгъандыла. Юлгюге, Казийланы Альбина суратлау искусствону, декоратив-прикладной эм техника чыгъармачылыкъны «Палитра ремесел» деген республикалы конкурсунда биринчи, Холаланы Элдар – экинчи, Рахайланы Алёна бла Текеланы  Айза уа – ючюнчюле  болгъандыла. Аттоланы Залим «Рисуем заповедную КБР - 2020» муниципал эришиуде экинчи жерни алгъанды. Созайланы Амина Уллу Хорламны 75-жыллыгъына аталгъан «Слава тебе, победитель солдат» деген республикалы конкурсну муниципал кезиуюнде хорлагъанды. «Звонкие голоса России» битеуроссей эришиуню муниципал кезиуюнде Батчаланы Аминат ючюнчю жерге чыкъгъанды.

Музыка дегенча дерследе сабийни жетишимлиги, фахмусу уллу магъананы тутады. Устаз билдиргенича, школда хунерли окъуучула бардыла, жырларгъа, тепсерге сюйгенле да аз тюйюлдюле. 

Ишини юсюнден айта, Майя Исмаиловна гитчени бир затха хунери болмаса, башха жерде уа фахмусу ачыкъланыргъа боллугъун, мектепде аны тунчукъдурмай айнытыргъа тийишлилигин чертеди. Устаз сабийлени сюерге керекди, ол кезиуде аны иши тынч, зауукълу да барлыкъды, окъуучуларыны жюреклеринде, эслеринде огъурлулукъну, тазалыкъны белгисича къаллыкъды, дейди ол.