Юч гёжефибиз къыралны биринчилигине къатышырыкъдыла

 «Олимпийская деревня-80» спорт арада грек-рим тутушуудан Москваны биринчилиги бардырылгъанды, анга 24 жыллары толмагъан гёжефле къатышхандыла.

Анда Элбрус райондан Байзуллаланы Ю.К. атлы олимпиада резервли спорт-школдан Бапиналаны Къурман да тутушханды. 18-жыллыкъ спортчу 57 килограммгъа дери ауурлукъ къауумда эришгенди. Къаршчы спортчуладан жыл сан бла гитчерек болгъанына къарамай, ол доммакъ майдалны къытханды. Къурман юч тюбешиуюнде хорлагъанды, жангыз биринде кесинден сынамлы гёжефге къытдыргъанды.

 Ючюнчю жерни алгъаны Бапина улугъа Россейни юниор биринчилигине къатышыргъа эркинлик бергенди, ол а жууукъ заманда Владивостокда боллукъду. Аны тренерле Хапаланы Аслан бла Башийланы Махмут юйретедиле. 

Россейни биринчилигинде тутушургъа эркинликни алгъаракълада спорт школну дагъыда эки келечиси – Кациланы Абдурахман бла Махийланы Азрет-Али - къоруулагъандыла. Абдурахман СКФО-да хорлагъан эди, Азрет-Али а – ЮФО-да.