Нальчикни 28-чи номерли орта школунда къоркъуусуз  жашау бардырыу бла байламлы комплексли дерсле берилгендиле. Бу иш сабийлени тюрлю-тюрлю болумлада  кеслерин хатадан сакъларгъа, от  тюшгенде апчымазгъа, башха къоркъуулу кезиуледе да кеслерин тюз жюрютюрге юйретир мурат бла тамамланнганды. 

 Дерслени МЧС-ни надзор иш жаны бла инспекторлары, «Россейни Къызыл жор» организацияны жер-жерли бёлюмюню волонтёрлары бергендиле. Ала  жорукъланы ангылатхандан тышында, ачыгъаннга биринчи болушлукъ этерге юйретгендиле, экстренный службаланы къалай чакъырыргъа кереклисин эсгертгендиле. Баш магъана огнетушительле бла хайырланыугъа юйретиуге эм жана тургъан мекямдан терк къалай чыгъаргъа боллугъуна, от тюшгенде ууланмаз ючюн не этерге тийишлисине берилгенди.

Дерследен сора уа жарау халда мектепде сигнализация ишлетилгенди, устазла окъуучуланы мычымай эшикге чыгъаргъандыла. Юйрениулени чегинде мектепге уллу от тюшгенни ёчюлтгенле  жетгендиле. Ала мекямдан ачыгъан адамны къалай чыгъарыргъа кереклисин, кислород маска къалай кийдирилгенин, от ёчюлтюучюлени машиналарында не болгъанын кёргюзтгендиле. Андан сора тамата классланы окъуучуларына зауукълу эришиуле да къуралгъандыла: ала къутхарыучуланы кийимлерин терк кийиуде, эстафетада сынашхандыла. Мектепде уа сабийлени от тюшюуге къажау темагъа суратларындан кёрмюч къуралгъанды.

Министерстводан билдиргенлерича, юйретиу дерсле хайырлылыкъларын баямлагъандыла, окъуучула кёп жангы зат билгендиле.