Бюгюннгю болумда регион экономиканы тохташыулугъун жалчытыуну сюзгендиле

«Шимал Кавказ – 2022: санкцияланы болумларында экономиканы тохташыулугъун жалчытыу амалла» форумну чеклеринде КъМР-ни Башчысы Казбек Коков РФ-ни Президентини Шимал-Кавказ федерал округда толу эркинликли келечиси Юрий Чайканы таматалыгъында бардырылгъан кенгешге къатышханды.

Кесини обращениясында Юрий Чайка «хар тийрени экономикасыны айныууну энчи ызлары, анга кёре эм апчыгъан бёлюмлери да, Президент салгъан борчланы жангыча тамамлау амаллары да болгъанларын» белгилегенди. Къырал Башчыны толу эркинликли келечиси Шимал Кавказны регионларына болушлукъ тапдырыргъа хазырлылыкъны чертгенди.

СКФО-ну регионларыны экономика тохташыулукъларын кётюрюу теманы сюзюуге РФ-ни экономика айнытыу министрини орунбасары Сергей Назаров, ВЭБ.РФ-ни шахар айнытыу жаны бла тамата управляющий партнёру Ирина Макиева, «Сбербанк» ПАО-ну Юг-Запад банкыны председатели Евгений Титов, «Кавказ.РФ» АО-ну генеральный директору Хасан Тимижев, Шимал-Кавказ федерал университетни ректору Дмитрий Беспалов, СКФО-ну регионларыны оноучулары къошулгъандыла.

Казбек Коков жыйылгъанлагъа Къабарты-Малкъарда социал-экономика болумну юсюнден билдиргенди. Бюгюнлюкге регионда болум тохташыулуду. Экономика эм социал тохташыулукъну жалчытыугъа бурулгъан амалланы бардырыу жаны бла координация штаб ишлейди, тёрт ызда отрасль ишчи къауумла къуралгъандыла, исси ызла ишлейдиле.  Социал магъаналы товарланы багъаларына кюн сайын къаралгъанлай турады, керексиз уллу сурам эм багъаланы бийик кётюрюлюулери эсленмейдиле.

Республиканы таматасы промышленный бёлюм тёрели низамда ишлегенин айтханды. Миллет эм инвестицияла проектле жашаугъа кийириледиле, ол санда туризм бёлюмде. «Агропромышленный бёлюмню аллында продукцияны кёбейтиу эм импортну алышындырыу бла байламлы борчла салыннгандыла, анга себеплик этерик къолайлыгъыбыз барды, - деп айтылынады докладда. – Бусагъатда урлукъ салыу ишлени къызыу заманыды, анга керекли хар затыбыз да жетишеди. Салынырыкъ урлукъла бла кесибизни толусунлай жалчытабыз, башха субъектлеге да жетдиребиз, Жемиш-кёгет консерваланы, жемиш-жилек продукцияны производствосун ёсдюрлюкбюз».

Регионну Башчысы аш-азыкъ бёлюмге эм регион тизмеде болгъан магъаналы предприятиялагъа керек болса болушлукъ тапдырыу онглагъа федерал эм регион даражалада къаралгъанын да белгилегенди.