Ал жанында - школланы мекямларына тынгылы этиуню соруулары

Къабарты-Малкъар Республиканы Башчысы Казбек Коковну буйругъу бла къуралгъан Битеулю билим берген организацияланы мекямларына тынгылы ремонт этиу жумушлагъа къарагъан комиссияны биринчи жыйлыуу къуралгъанды. Тюбешиу комиссиягъа председательлик этген КъМР-ни Правительствосуну вице-премьери Марат Хубиевни таматалыгъында бардырылгъанды, ары министерстволаны келечилери, шахар округланы эм муниципал районланы оноучулары къатышхандыла.

Къабарты-Малкъар Республиканы Правительствосуну эм Россейни Жарыкъландырыу министерствосуну араларында келишим тохташдырылгъанды, аны чегинде тынгылы ремонт этилирча 50 объект белгиленнгенди, аладан 10-су – ремонт ишле экижыллыкъ болжаллы болгъанла.

- Комиссия ишни тюрлю-тюрлю халлы амалларын хайырланырыкъды, ол санда тышына чыгъып, жер-жерледе багъа бичгенлени да. Биз мычымай оноула чыгъарыр ючюн, комиссиягъа программаны бардыргъан кезиуде къуралгъан сорууланы чыгъарыргъа тийишлиди, - дегенди Марат Хубиев, жыйылыуну ача.

КъМР-ни жарыкъландырыу, илму эм жаш тёлюню ишлери жаны бла министри Анзор Езаов билдиргеннге кёре, республиканы битеулю билим берген организацияларыны араларында ремонт битеу да 75 мекямда изленеди. Ол дагъыда 2022 жылда «Къабарты-Малкъар Республиканы мектеп билим бериу системасын игилендириу» регион программаны бардырыу жаны бла амалланы жыйымдыгъын туура этгенди.

«Билим бериуню айнытыу» къырал программаны чегинде 2023 жылны ахырына дери тамамланып бошаллыкъ ремонт ишле бардырылырча 50 мекям сайланнганды. Быйыл тынгылы ремонт 29 объектде башланырыкъды. Белгиленнген борчлагъа федерал бюджетден 2,3 миллиард сом бёлюнюрюкдю, ары окъутуу эм юйретиу керекле бла жалчытыугъа къоранчла да киредиле. Тынгылы ремонтну чегинде дизайнер оноуланы сюзюуге окъуучула, ата-анала эм устазла къошуллукъдула.
 
Андан сора да, террордан къоруулау излемлеге тийишлиликде школла битеу керекле бла жалчытылынырыкъдыла. Республиканы Башчысыны оноуу бла республикалы бюджетде дерсликлени жангыртыуну 100 процентге жалчытырча быйыл 14 миллион сомдан артыкъ ырысхы белгиленеди.

Жыйылыуда «Къабарты-Малкъар Республикада 2022 жылда мектеп билим бериу системаны игилендириу» регион проектни бардырыу «жол карта» къабыл кёрюлгенди.

Ремонт ишле Прохладный шахарны 42-чи номерли школунда эм 6-чы номерли гимназиясында башланнгандыла, Терек шахарда 1-чи номерли лицейде эм Т.К. Мальбахов атлы 3-чю номерли школда подряд организацияла ремонтну 25 апрельде башларыкъдыла. Бирси 20 объектле бла байламлы контрактла тохташдырыуну 28 мартдан 8 апрельге дери бардырыр умутлудула.

- Муниципалитетлени депутат корпусу да ремонт этилген объектлеге къарарыкъды. Республиканы Башчысы борч салгъанды, аны толтурлукъбуз, – дегенди Марат Хубиев ахырында.