Махтаулу уланларыбыз

Кереметланы Хыйсаны эки уланы Зариф бла Зафир миллетибизни жигит жашларыдыла. Ала контракт жазып, энчи аскер операциягъа биринчи кюнледен бери къатышадыла. Жашла Дербентни къырал университетинде юристле хазырлагъан факультетде тёртюнчю эм бешинчи курслада окъуй турадыла.

 Ата журтларын сюйген таулу уланланы жигитле, ётгюрле болгъанларын биргелерине къуллукъ этген тенглери да белгилегенлей турадыла. Зариф биринчи кюнден бери къуллукъ этип, сынам жыйгъаны себепли энди келген жашлагъа да болушады, юйретеди. Зафир а, къуллукъ этгенинден сора да, аскерчиле тургъан жерге гуманитар болушлукъ келтиреди.

 Зафир «Аскер жигитликлери ючюн», «За ратную доблесть», «Аскер махтаулукъ ючюн 2-чи даражалы майдалла бла саугъаланнганды. Зариф а Георгий жорну» 4-чю даражалы ордени, «Аскер махтаулукъ ючюн» 2-чи даражалы, «Шуёхлукъну кючлегени ючюн» майдаллагъа тийишли болгъанды. 

Аналары  Мариямны гитче эгечи Мушкаланы-Беппайланы Жаннет а,  Зарифге бла Зафирге жюрек ыразылыгъын, сюймеклигин билдире, назму жазгъанды.  Жашла юйлерине сау-саламат, хорлам бла жыйышырларын тежей, ол тизгинле бла окъуучуларыбызны да шагъырей этерге сюебиз.

Эгечден туугъанлагъа

Жыйырма экинчи февральны кюню

Къыяма айланнганнга ушады,

Кечеден тангнга аллай хапар –

Къазауат башланды деп жайылды.

Ким къайры барсын, къайда?

Киши кишини эшитмей,

Ариу балала чыгъып кетдиле,

Не болурбуз деп, сагъыш этмей.

Эгечден туугъан эки жаш сабий

Жюрек жауубузну ашайдыла,

Ючюнчю жылны февралы болду,

Окъ, топ тюбюнде жашайдыла.

Келдиле ала – кюнюбюз чууакъ,

Кетселе, жюрек ачыта,

Тилек этебиз Аллахны аллында, -

Болмасын арабыз тузакъ.

Эгечим Мариям, сенде тёзюмлюк

Болмаз адамла кючюнде,

Жашларынг урушда, хар затны кёре,

Билесе, кесинге кёл этдире.

Барды сизде адамлыкъ, кишилик,

Чынтты жигитлени санында

Баргъан жолугъуз, къууанчлы болсун,

Аллах буюрсун сау къайтыргъа.

Зарифим, Зафирим, жаннган жулдузла!

Сиз жарытханча дунияны,

Аллах ачытмай душман къолундан,

Болсун жолугъуз мамукъдан.

Сизнича жашланы ёсдюрген анала,

Келсинле бар игиликле уа алагъа!