Республикада спорт бла кюрешгенлени саны ёседи

КъМР-ни Башчысы Казбек Коков Россейни спорт министри Олег Матыцин башчылыкъ этип бардыргъан жыйылыугъа къатышханды. Тюбешиу Владикавказда Шимал Кавказ федерал округну регионларыны оноучулары къатышып ётгенди. 

Анда Шимал Кавказны регионларында физический культура эм спорт бла байламлы магъаналы сорууланы сюзгендиле. Сёз шёндю хайырланнган спорт инфраструктурагъа саналгъан мекямланы жангыртыу эмда жангыланы ишлеуню юсюнден баргъанды.

Къабарты-Малкъар Республикада сагъынылгъан ишле федерал, регионал программаланы эм да «Спорт-жашауну мардасы» проектни чеклеринде бардырыладыла. Озгъан жылда спорт учрежденияланы шёндюгюлю оборудование бла жалчытыу ишле тамамлангандыла, элледе  «акъыллы» спорт майданла биринчи кере ишлеп тебирегендиле. Сагъынылгъан ишле андан ары тохтарыкъ тюйюлдюле.

 Былтыр хайырланыргъа берилген эм уллу спорт инфраструктурагъа шёндюгюлю пятиборье бла кюреширча Нальчикде ишлеп бошалгъан спорт комплекс саналгъанды. Быйылгъы жылда спортну къыш тюрлюлери бла   кюреширча буз мекямны-физкультура саулукъну кючлендириу комплексни къурулушун ишлеп бошаргъа мурат барды.

Республикада спортха уллу сейир барды. 2023 жылда Къабарты-Малкъарны 400 спортчусу тюрлю-тюрлю халкъла аралы, битеуроссей регионла аралы даражалада бардырылгъан, ол санда олимпиалы, паралимпиалы эм сурдлимпиалы эришиуледе хорлагъандыла. Республикада кёп тюрлю эришиуле бийик даражада ётгендиле. Кюн сайын адамланы физический культура эм спорт бла кюрешгенлени саны ёседи, ол регионда жашагъанланы жартысындан асламды, ол саннга сабийле эм абаданла да киредиле, деп билдиредиле республиканы оноучусуну бла правительствосуну пресс-службасындан.