Байламлыкъланы айнытыу сорууланы сюзгендиле

Тюнене Нальчикде КъМР-ни Башчысы Казбек Коков бла Ставрополь крайны  губернатору Владимир Владимиров регионла аралы байламлыкъланы кенгертиу сорууланы сюзгендиле. Агропромышленный комплекс бла туризмни айнытыу - ма аладыла бирге ишлеуню къыйматлы амалларын хайырланыу. Андан сора да тахта кёгетлени эм урлукъланы ёсдюрюу бёлюмде, жолоучулукъда да регионланы араларында байламлыкъланы кючлерге мурат барды, деп билдиреди республиканы оноучусуну бла Правительствосуну пресс-службасы.

Бек алгъа, артыкъ уллу эс Пятигорскда «Машук» билим бериу арада бирге бардырыллыкъ билим бериу жаны бла жаш тёлю программаланы  жашауда  бардырыргъа бёлюннгенди. Россейни Президенти Владимир Путинни буюрууу бла насийхатчылыкъны профессионал жаны бла айнытыуда сагъынылгъан ара эм къыйматлы майдан боллукъду. Андан сора да тюбешиуде Шимал Кавказ федерал округну регионларыны Кавказ инвестиция форумгъа хазырланыу эм анга къатышыуну юсюнден соруулагъа  да къарагъандыла. Ол форум майны аягъында Минеральные Воды шахарда бардырыллыкъды.

Казбек Коков дагъыда Владимир Владимировха  Къабарты-Малкъаргъа келгенине эм Нальчикде жашагъан Аздар бла Назар Неткачевлени тилеклерин толтургъаны ючюн ыразылыгъын билдиргенди. Ставрополь крайны губернатору ол сабийлени тилеклерин Кремльде Къырал советни жыйылыуу бардырылгъан кезиуде Жангы жылгъа жасалгъан назы терекден алгъан эди. «Ол заманда мен Ставрополь крайны Михайловск шахарында жашагъан Захарны бла аны къарындашыны тилеклерин сюйюп толтургъанма. Битеуроссей жандауурлукъ акцияны кезиуюнде юлешиннген саугъала, барысыда иелерин тапхандыла. Россейни Президенти Владимир Владимирович Путинни башламчылыгъыны хайырындан уллу къыралны регионларыны араларында байламлыкъла бютюнда кючленнгендиле. Бу акция бизни тёрелерибиз жууукъ болгъанларын, битеу адамланы араларында огъурлулукъ къалай кереклисин бирча ангылагъаныбызны кёргюзтгенди», - деп чертгенди Къабарты-Малкъарны Башчысы.