АПК-да уруннганлагъа болушлукъ мычымай жетерге керекди

Аш-азыкъ рынокда болумну, сабан ишлеге хазырланыуну эмда аланы бардырыуну, аграрчылагъа  къырал бёлген ахчаны бериуню юсюнден сёлешгендиле РФ-ни Эл мюлк министерствосунда бардырылгъан кенгешде. Анга КъМР-ни эл мюлк министри Хасан Сижажев да къатышханды.

Федерал министерствону башчысы Дмитрий Патрушев, сагъынылгъан рынокну юсюнден айтханда, аш-азыкъ продукция тюкенлеге бек терк жетгенин чертгенди. Алгъаракълада болгъан ишле бла байламлы болум, сёз ючюн, бал туз бла, шошайгъанын, белгилегенди.

Урлукъ себиу онтогъуз регионда башланнганды, иш 542 минг гектарда тамам этилгенди. Кюзлюкле ёсген алты миллион гектарда аграрчыла семиртгичле жайгъандыла. Мюлкле урлукъла бла толусунлай жалчытыныпдыла. Отлукъну бла минерал семиртгичлени къытлыкълары жокъду. Алай дагъыда аны бир тюрлюсю (аммиак селитра) азлыкъ этмезча, аны тыш къыраллагъа сатыуну биринчи майгъа дери тохтатыргъа оноу этилгенди.

Къырал аграрчылагъ берген болушлукъну иелерине жетдириуге энчи эс бурулгъанды. Дмитрий Патрушев регионланы келечилерине бу жаны бла тирирек болугъуз дегенди, учуз кредитле бла жалчытыуну къолгъа алыргъа чакъыргъанды.

Эсге сала айтсакъ, аграр бёлюмге къырал быйыл бек уллу болушлукъ этеди. «Шёндюгю болумда, анга тийишли болгъанлагъа ахчаны заманында жетдириу бютюнда магъаналыды», -деп белгилегенди министр.