Ашны хайыры бла байламлыкъланы, шуёхлукъну да кючлерге

Алгъаракълада Къабарты-Малкъарда Азейрбайджанны миллет ашарыкъларыны кюнлери бардырылгъандыла. Ол къыралдан келген кулинарланы къауумуна Таир Амирасланов башчылыкъ этгенди.

Биринчи кюн ол КъМКъАУ-ну студентлерине бла преподавательлерине тынгылы лекцияла окъугъанды. Бизни жерлешлерибиз Азербайджанны ашларыны, тарыхыны да юсюнден кёп сейир шартладан хапарлы болгъандыла. Сёз ючюн, ол къыралны жеринде болгъан Гобустан археология заповедникни юсюнден эшитгендиле, анда къаялада эчкилени суратлары болгъанларын да билгендиле.

Андан сора да, уста эчкини къалай  санларгъа керек болгъанын, малны къайсы жери къаллай азыкъгъа жарарыгъын да эшитгендиле студентле.

Экинчи кюнде къонакъла «Акрополь» маданият-той-оюн арагъа баргъандыла. Анда уа КъМКъАУ-да жамауат ашла хазырлауну технологиясын окъутхан преподавательлеге бла студентлеге  азербайджан ашланы хазырлауну амалларын кёргюзтгендиле. Анда кулинарла жууукъ тыш къыралны аш этиучюлерини арасыны генеральный директоруну орунбасары, Азербайджанны аш этиучюлерини миллет ассоциациясыны вице-президенти, инженер-технолог, халкъла аралы судья эмда аш этиу жаны бла чемпионатлада хорлагъан Джейран Аскерованы башчылыгъында шах-пловну, долманы, шекербурну, пахлаваны, кюкюню эмда башха ашланы хазырлауну жашырынлыкъларын ачыкъ этгендиле.

- Азербайджанлыланы тёрт мингден аслам ашлары барды, - деп белгилегенди Джейран. – Аны бла бир ыйыкъны ичинде шагъырейленир онг жокъду. Алай биз онбешден артыкъ ашыбызны кёргюзтюрге хазырбыз. Ала исси эмда сууукъ къатыкъла, татлы затла, тюрлю-тюрлю ичгиледиле. Дагъыда биз ол не да башха азыкъны хазырлагъанда, къаллай продуктланы хайырланнганыбызны да билдирирге сюебиз».

Мастер-классла бошалгъандан сора анга къатышханланы барын да ингирги ашханагъа сыйланыргъа чакъыргъандыла.

Аш этиуню байрамыны ючюнчю кюню уа Нальчикни тарых магъаналы ачыкъ турист майданы «Сосрукъда» ётгенди. Ары келгенлени мастер-классланы кезиулеринде хазырланнган ашла, суула, татлы затла бла къууандыргъандыла, алагъа себепликни уа жарыкъ, жылы кюн, таза хауа да этгендиле.