«Халкъ программаны къабыл кёрюу бюгюнлюкде адамларыбызны жарсытхан кёп кемчиликлени кетериуге бурулупду»

КъМР-ни Башчысы Казбек Коков «Единая Россия» политика партияны ХХ съездини пленар жыйылыууна къатышханды. Анда партияны Къырал Думаны сегизинчи чакъырылыууна айырыулагъа хазырлагъан халкъ программасы къабыл кёрюлгенди.

Пленар жыйылыугъа Россейни Президенти Владимир Путин, «Единая Россияны» председатели Дмитрий Медведев, партияны Генсоветини секретары Андрей Турчак, «Единая Россияны» Баш советини таматасы Борис Грызлов, РФ-ни къоруулау министри Сергей Шойгу, «Единая Россияны» Къырал Думада фракциясыны башчылары, РФ-ни Правительствосуну, Федерация Советни келечилери да къатышхандыла.

Казбек Коков съезд бошалгъандан сора кесини Инстаграмда бёлюмюнде къырал башчыны пленар жыйылыуда сёлешиуюню юсюнден оюмун билдиргенди: «Халкъ программаны къурауну баш магъанасы – жамауат бла байламлы болууду. Владимир Владимирович аны энтта да бир кере чертгенди: «Халкъ бла аны къууумларыны юсюнден ачыкъ сёлеширге керекди. Жаланда ма алай бла билирге эмда ангыларгъа боллукъду инсанларыбызны жарсыуларын, къайгъыларын да. Андан сора уа аланы оюмларын, башламчылыкъларын партияны айырыула аллы программасына кийирирге тийишлиди», - дегенди.

Россейни Президенти дагъыда «Единая Россия» регионлада айырыучула бла тюбешиуледен, тюзюнлей эфир бла ушакъладан сора жарашдыргъан магъаналы социал мадарланы бир къауумун туура этгенди. Аланы арасында уа пенсиячылагъа бла сабийли юйюрлеге болушлукъгъа ахча бериуню юсюнден оноу да барды (бир кере). Къырал башчы къыяулары болгъанланы иш бла жалчытыуну энчи программасын жарашдырыргъа, адамны борчу бар эсе, аны социал тёлеулеринден алыргъа эркин этмеуню закон бла бегитирге кереклисин белгилегенди. Дагъыда ол сабийлери болгъан юйюрлеге болушлукъ кенгере барлыгъын да чертип айтханды.

Гитче эмда орта бизнесге, эл мюлкде уруннганлагъа себеплик этиу да магъаналы борчха саналгъанын да къатлагъанды Владимир Путин. Оюла тургъан юйледен кёчюрюуню юсюнден айта, ол жангы программагъа 2021 жылны 1 январына дери эсепге тюшген юйле да кирликлерин эсгертгенди. Президент кесини сёлешиуюнде эллени, инфраструктураны айнытыуну, элде жашауну игилендириуню, шахарда ырахатлы болум къурауну юсюнден да айтханды».

«Халкъ программаны къабыл кёрюу бюгюнлюкде адамларыбызны жарсытхан кёп кемчиликлени кетериуге бурулупду. Къабарты-Малкъарда да ала аз тюйюлдюле, аланы кетере барыу бизни баш ишлерибизден бири боллукъду», - деп чертгенди Къабарты-Малкъарны Башчысы.