КъМР-ни Башчысы Халкъла аралы аскер-техника форумну ишине къатышханды

КъМР-ни Башчысы Казбек Коков Халкъла аралы «Аскер-2021» деген аскер-техника форумну ишине къатышады, ол Россей Федерацияны Сауутланнган кючлерини «Патриот» деген аскер-патриот культура паркында бардырылады.

Форумну Россей Федерацияны Президенти Владимир Путин ачханды, къыралны оноучусу кесини алгъыш сёзюнде былай айтханды: «Форумну чеклеринде 28 мингден артыкъ шёндюгюлю техникадан бла сауутдан-ол санда атдырылыучуладан артилериягъа дери, танкла, аскер самолётла да кёргюзтюлгендиле. Аланы асламысы керти уруш баргъан кезиуледе сыналгъандыла, кеслерини ышаннгылыкъларын эм къыйматлылыкъларын кёргюзтгендиле.

Россейни къоруулау-промышленность  комплексин эм Аскер кючлерин  жангы технология мурдорда айнытабыз, бизни илмуну жетишимлерини мурдорунда, фундаментальный тинтиулени программаларында, ол себепден форумда аллай бёлюмлеге аслам эс буруллукъду, артыкъ да аскерге искусственный интеллектни эм робототехниканы, связны жангы системаларын эм управленияларын, башхача айтханда, аллай компонентлени кийиребиз, аскер кючлери дунияда эм кючлю къыралланыкъыча, бизни Сауутланнган кючлерибиз да алай боллукъдула».  

РФ-ни Къоруулау министри Сергей Шойгу билдиргеннге кёре, форумгъа 97 къыралны келечиси къытышады, аны чеклеринде Россейни Къоруулау министерствосу 500 миллиард сом багъасы 45 къырал контрактха къол салыргъа умут этеди.

«Армия 2021» форум  башда сагъынылгъан жерде 28 августха дери барлыкъды, андан сора Кубинка аэродромда, «Алабино» полигонда эм битеу аскер округлада да.

Форум бла бирге 22 августдан  4  сентябрге дери VII Халкъла аралы аскер оюнла бардырыллыкъдыла, ары 44 къыралны командасы къатышады.

Къабарты-Малкъарда  Халкъла аралы аскер оюнланы бир кезиую ётеди - «Минги тауну тогъайы» деген конкурс. Анга Россей, Къытай, Пакистан, Къазахстан, Армения, Абхазия, Узбекистан  эм Индия къыралладан альпинистле къатышадыла.

Бюгюн окъуна Казбек Коков   форумну  чеклеринде «Къоруулау-промышленность комплексде  халкъ мюлкде хайырланырыкъ шёндюгюлю товарланы чыгъарыу (диверсификация) . Промышленностну мурдорун заманны излемине кёре тюрлендириу» деген экинчи конгрессни  ишине къатышханды. Ол форумну баш илму ишчи программасына саналады, кеси да Россей Федерацияны Президентини буйрукъларын толтуруу бла байламлы производство иш бла кюрешгенлеге  къырал болушлукъ эм къоруулау-промышленность комплексде диверсификация этер мурат бла бардырылады.

Конгрессге къатышханла озгъан жылда ётген диверсификацияны кёрюмдюлерине къарагъандыла, шёндюгю болумла бла шагъырейленнгендиле эм къоруулау-промышленность комплексни мындан ары айнытыу жолларын сюзгендиле. Кётюрюлген сорууланы ичинде транспорт комплекс, саулукъ сакълау, чыгъарыучу промышленность, радиоэлектроника,  отлукъ-энергетика комплекс, экология, эл мюлк, кемеле ишлеу эм башха бёлюмле болгъандыла. Форумну  кёрюмдюлерине кёре, къоруулау- промышленность комплексни биригиулерини эм РФ-ни регионларыны оноучулары бла келишим этилликди.