Прохладныйде сегизинчи мектепде жангы мекям ачыллыкъды

КъМР-ни Башчысы Казбек Коков Прохладный шахарда Александр Сергеевич  Пушкин атлы сегизинчи номерли школгъа 560 окъуу жери болгъан къошакъ мекямда къурулуш ишле къалай бардырылгъанларына къарагъанды.

Къурулушну башларгъа регионну башчысы 2021 жылда декабрьде Прохладныйде мектепни коллективи бла тюбешгенде оноу этген эди.

Мекямны «Билим бериу» миллет проектни чеклеринде 1960 жыллада хайырланыргъа берилген эски школну орунунда ишлегендиле. Къурулуш ишле баргъан кезиуде дерсле экинчи корпусда ётгендиле. Шёндю эки мекямны да бир тюрсюнлю этгендиле эм бирге къошхандыла. 

Жангы мектепде актовый зал, аш ашаучу уллу жер, лаборатория, школ дерслени ётдюрюрге деп битеу хар керекли затлары бла жалчытылынып жарашдырылгъан кабинетле эм спорт зал да барды. Мында дерсле узакъгъа созулмай башланырыкъдыла.